Наурыз айы облыс оқушылары үшін табысты басталды. Олай дейтініміз, жас өрендер осы айда ұйымдастырылған 4 байқаудан да қоржынымызға жүлде салып үлгерді.
Білім бәсекелерінің әрқайсысына жеке тоқталсақ, 28 ақпан – 4 наурыз аралығында Астана қаласындағы «Нұр Орда» мектеп-лицейінде «Kazakhstan Robotics Challenge» робототехника байқауы өтті. Дарындылар додасында әулиеаталық оқушылар өздері ойлап тапқан түрлі туындыларын таныстырды.
«KRC-2019» – Қазақстанның түкпір-түкпіріндегі мектеп жасындағы балалардың робототехника бойынша талдамалық және дизайнерлік дағдыларын көрсетуге мүмкіндік беретін бірегей алаң. Осымен төртінші рет ұйымдастырылып отырған бәсекеге облыстық «Дарын» мектеп-интернатының – 2, облыстық дарынды балаларға арналған мамандандырылған ІТ лицей-интернатының 10 оқушысы қатысып, жүзден жүйрік шықты. Облыс намысын қорғаған өрендер 2 алтын, 4 күміс және 6 қола медальмен марапатталды.
Ал Павлодар қаласында өткен Ә.Бектұров атындағы V халықаралық химия олимпиадасынан да білімпаздарымыз құр қол қайтқан жоқ. Білім бәйгесінің бұлай аталуының себебі – қазақтың көрнекті ғалымы, Қазақстан химиясының негізін қалаушы академик Әбікен Бектұров осы өңірдің тумасы.
Байқау екі кезең бойынша өтті. Нәтижесінде облыстық дарынды ер-балаларға арналған мамандандырылған «Білім-инновация» мектеп-интернатының оқушылары – Мұсахан Сырлыбай күміс медаль және Нұрдәулет Сейдахмет қола медаль еншіледі. Дипломмен және бағалы сыйлықтармен марапатталған олар бұл жетістікке жетуде химия пәнінің мұғалімі Динчер Тунджайдың да үлкен еңбегі барын айтады.
Қоржынымызға келесі бір жүлдені салған – Шу ауданы Жібек жолы мектеп-лицейінің 11-сынып оқушысы Балнұр Жаңқабай. Ол Оңтүстік Кореяның Тэджон қаласында өткен «Жас ғалым» халықаралық ғылыми байқауынан қола медаль иеленді.
Тағы бір сайыс әл-Фараби атындағы Қазақ ұлттық университетінің механика-математика факультетінің ұйымдастыруымен өтті. Ө.Жолдасбеков атындағы халықаралық байқаудың қорытындысы бойынша жамбылдық 10 оқушының 7-еуі жеңімпаз атанды. Білім додасының мақсаты оқушылардың зерттеу қызметінің құрылымын және ұйымдастыру жүйесін жетілдіру, математика ғылымдарының саласына қызығушылығы және зерттеулерге қабілеттері бар оқушыларды анықтау болатын.
Білім додасында 11-сынып оқушылары жеңіс тұғырынан көріне білді. 4 оқушы күміс жүлдеге қол жеткізсе, 3 өрен қола медальды місе тұтты.
Әйгерім ИЕМБЕРДИЕВА,
облыстық білім басқармасының
баспасөз хатшысы.
Comments are closed.