АСТАНА. ҚазАқпарат — Жеке куәлігін «шетелдік компанияданмын» деген алаяққа ұстатқан солтүстікқазақстандық тұрғындар қалайша банк борышкеріне айналғанын білмей қалған, деп хабарлайды ҚазАқпарат тілшісі.
СҚО ІІД баспасөз қызметінен хабарлағандай, Петропавл қаласының бірнеше тұрғыны өздерінің қалайша банк және микроқаржылық ұйымдардың борышкері екенін білмей қалғанын айтып арызданған.
«Жедел-іздестіру шаралары барысында 23 жастағы Петропавл қаласында тұратын бойжеткен қолға түсті. Желілік маркетинг бойынша жұмыс жүргізетін шетел компаниясының өкілі ретінде өзін таныстырған ол «клиенттерінің» сеніміне кіріп, олардың жеке куәлігін «компаниямен ынтымақтасу бағдарламасына тіркеймін» деп алып отырған. Ал шынтуайтына келгенде интернет-банкинг арқылы ол жәбірленушілердің атынан несие алған», — делінген хабарламада.
Тергеушілер әккі бойжеткеннің 19 қылмыс фактісіне қатысы барын анықтап отыр. Алаяқ жәбірленушілердің жалпы 1 миллион теңгеге жуық ақшасын жымқырған. Қазіргі уақытта ол Қылмыстық кодекстің 190-бабы 2-бөлігі бойынша (алаяқтық) жауапкершілікке тартылуда.
«Қандай жағдай болмасын жеке құжаттарыңызды бөгде адамға беруге асықпаңыз. Бөтен адамдардың атынан несие алу үшін алаяқтар бұрын күрделі комбинацияларды жүзеге асыратын. Ал қазір интернет-банкингтің мүмкіндіктері қылмыскерлерге адамдардың жеке мәліметтеріне қол жеткізу арқылы алаяқтыққа баруына жол ашады», — деп ескертеді СҚО ІІД қылмыстық полиция басқармасының бастығы Петр Климов.
Comments are closed.