Ауыр атлетикадан қыздар арасында ел намысын қорғаған Карина Горичева қоссайыстың қорытындысы бойынша келіні 243 (111+132) көтеріп, Рио олимпиадасының қола жүлдегері атанды.
Бұл туралы Риодағы ҚазАқпарат тілшісі хабарлады.
Серпе көтеруде қытайлық атлет 147 келіні енсерді. Қос сайыстың қорытындысы бойынша 262 келімен Дэнг Вэй әлемдік рекордты жаңартты (115+147). Екінші орын Солтүстік Корея өкілі Чу Хе Симге бұйырды 248 (105+143). Ал Горичева серпе көтеру жаттығуын 132 келімен аяқтап, қола жүлдегер атанды.
Серпе көтеруде жерлесіміз бірінші мүмкіндігінде 132 келіні бағындырса, екінші және үшінші мүмкіндігінде 137 келіні көтере алмады.
Ал осыған дейін алғашқы жаттығуда ол бірінші мүмкіндігінде 107 келіні бағындыра алмады. Ал екінші мүмкіндігінде тура осы салмақты қиналмай бағындырды. Үшінші мүмкіндігінде 111 келі зілтемірді басынан асыра көтерді.
Міне, осылайша бүгін Қазақстан қоржынына үшінші қола медаль түсті.
Естеріңізге сала кетейік, Горичева ауыр атлетикамен 15 жасынан бері айналысып келеді. Ол ерекше дарынды балаларға арналған республикалық мектеп-интернатының түлегі.
Ол жасөсіпірмдер арасындағы Әлем чемпионатының күміс, қола жүлдегері және жасөспірімдер арасындағы Азия чемпионатының қол жүлдегері.
Қазақстан Республикасының халықаралық дәрежедегі спорт шебері.
Естеріңізге сала кетейік, Олимпиаданың бірінші күні дзюдошы Елдос Сметов күміс, Галбадрах Отгонцэцег қола медаль еншілесе, кеше ауыр атлет Фархад Харки үшінші медальді ел қоржынына салды. Сондай-ақ, айта кетейік, жарыстың бірінші күні Маргарита Елисеева бесінші орынға, екінші күні Арли Чонтей төртінші орынға табан тіреген болатын.
Ақпарат көзі: ҚазАқпарат
Comments are closed.