Талас ауданына қарасты Тамды ауылында 1923 жылы туған Ниязбек пен әпкесі Әтіркүлдің балалық шағы қиын-қыстау кезеңге тұспа-тұс келді. Олардың әкесі Егемберді аталған ауылдағы байлардың бірі болғандықтан, ұжымдастыру дәуірінде «бай-кулак» деген атпен қолына кісен салынып, жер аударылып кеткен болатын. Бірі 6-да, енді бірі 8-ге толмаған қос балдырғанды жеткізу үшін анасы Ақжарқын барлық қиындықтарға қарсы тұрды. Ауылдағы мектептің 7-сыныбын бітірген Ниязбек өзінің білімге деген құштарлығымен сыныптастарынан баса озып, білім ошағын өте жақсы бағамен бітіріп шығады. Өзін-өзі әрдайым қамшылаудың арқасында орыс тілінде еркін сөйлейтін дәрежеге жеткен. Мектепті бітірген соң ауылдағы анасына жәрдемші болып, шөп шауып, егін салды, өгіз арба айдады.
Comments are closed.