Құрлықтық хоккей лигасының тұрақты чемпионатында Астананың «Барысы» Латвияның Рига қаласында жергілікті «Динамо» командасымен кездесіп, 3:2 есебімен жеңіске жетті.
Жанкүйерлер тартысқа толы кездесуге куә болды. Алғашқы кезеңде бірқатар шабуылдар ұйымдастырылғанмен, бір ғана шайба соғылды. 13-минутта Роман Старченконың соққысы көздеген жерінен дәл табылды.
Матчтың екінші кезеңінде айдын иелері қорғаныста сақ қималдап, жүйелі ойнауға тырысты. Осының арқасында 28-минутта Микс Индрашис мергендігімен танылып, таразы басын теңестірген, алайда, 36-минутта Найджел Доус командасын кезекті рет есепте алға шығарды.
Кездесудің соңғы 20 минутында Эдуард Занковецтен жаңа нұсқаулар алған «Барыс» ойыншылары қарсыластарын қыспаққа алып, қауіпті сәттерді жиі ұйымдастырды. 46-минутта Найджел Доус жеткізген шайбаны Дастин Бойд қақпаға дәл бағыттап, өз командасының үшінші шайбасын салды. Ал матчтың аяқталуына бірер минут қалғанда «Динамо» сапынан Лаурис Дарзиньш соңғы нүктені қойды.
Осымен 53 матчта 81 ұпай жинаған астаналықтар «Шығыс» конференциясында бесінші орынға көтерілді. Келесі кездесуін 28 қаңтар күні Минскіде «Динамомен» өткізеді.
Comments are closed.