Қазақстанда 25 мыңнан аса тарихи- мәдени мұра ескерткіштері бар. Оның ішінде 10 ескерткіш ЮНЕСКО-ның Бүкіләлемдік мұра тізімінде, 12463 ескерткіш республикалық және жергілікті маңызы бар тарих және мәдениет ескерткіші мәртебесіне ие. Мәдениет және спорт министрлігінің мәліметінше, алдағы уақытта тағы 5 тарихи ескерткішті ЮНЕСКО-ның Бүкіләлемдік мұра тізіміне қосу жоспарланып отыр.
Қожа Ахмет Ясауи кесенесі – еліміздегі ең танымал тарихи орындардың бірі және Орталық Азия аумағындағы орта ғасырлық сәулет өнерінің көрнекті туындысы.
Әмір Темірдің басшылығымен XIV ғасырда салынған кесене халқымыз үшін киелі орын саналады. Ясауи кесенесінің маңына 24 хан, сұлтан мен 57 батырдың, 18 бидің сүйегі жерленген. ЮНЕСКО-ның Бүкіләлемдік мұра тізіміне енген кесененің биіктігі – 39 метр. Ғимарат бір-бірімен түрлі дәліздер арқылы жалғасып жатқан 35 бөлмеден тұрады. Орталық бөлмеде көне жәдігер – Тайқазан орналасқан.
Көне дәуірден сыр шертетін Таңбалы тастар еліміздің аса маңызды тарихи мұраларының бірі. Ол – Орта Азиядағы жартастағы өнердің ЮНЕСКО- ның Бүкіләлемдік мұра тізіміне енгізілген тұңғыш ескерткіш.
Таңбалы кешеніндегі петроглифтердің төрт мың жылдық тарихы бар. Ал, суреттердің жалпы саны 5 мыңға жуықтайды. Жартастағы суреттер ертедегі адамдардың қоршаған әлемді қабылдауын көрсетеді, дүниетанымын танытады. Петроглифтер белгілі жүйемен және философиялық, танымдық бірізділікке негізделген.
Қойнауы құпияға толы Ақыртас сарай кешені VIII-XII ғасырларда салынған. Қабырғаларына қаланған тас блоктардың әрқайсысының салмағы бір тоннаға жуық.
Кейбір қашалған тастардың салмағы 10 тоннадан асады. Ғалымдар ЮНЕСКО-ның Бүкіләлемдік мұралар тізіміне енген Ақыртас кешенін араб деректерінде кезігетін, Ұлы Жібек жолының бойындағы Касрибас қаласы деп болжайды. Аумағы 2,5 гектарды алып жатқан бұл нысанның 70-ке жуық бөлмесі, 15 колонна галлереясы, кіреберіс қақпалары, ортада жарты гектар ашық алаңы болған.
Жетісудың жауһары, сәулет өнерінің тағы бір керемет туындысы – «Жаркент мешіті» сәулет- көркемөнер музейі.
Шегесіз салынған бұл мешіт 1887-1892 жылдар аралығында бой көтерген. Құрылыс жұмыстары Бейжіңнен шақырылған қытай маманы, инженер Хон Пиктің басшылығымен жүргізілген. Кешеннің жалпы жобасына бас қақпа, кіші мешіт, медресе, үлкен жұма мешіті, күйдірілген көк кірпіштен қаланған дуал қоршау енеді.
Айша бибі кесенесі – ХІ-XII ғасырлардағы сәулет өнерінің көрнекті ескерткіші.
Ойып жасалған өрнектердің көркемдігі мен сан түрлілігі жағынан басқа мемориалдық-дәстүрлі ескерткіштер ішінде оған тең келетіні жоқ. Кесене туристерді тек ерекше сәулетімен ғана емес, сонымен қатар Айша бибі мен батыр Қарахан арасындағы шексіз махаббат хикаясымен де қызықтырады.
Дайындаған Жүрсінгүл ЖАҚЫП.
Comments are closed.