Кейбір республикалық ақпарат көздері осыдан екі күн бұрын Талас ауданы Майтөбе ауылы су астында қалды деген ақпарат таратқан еді. Облыстық төтенше жағдайлар департаментінің мәлімдеуінше, бұл ақпарат шындыққа жанаспайды.
12-ші қаңтарда сағат 18:00 шамасында Майтөбе ауылы маңындағы Қаратауда күннің күрт жылынуы мен жауын-шашынның салдарынан қар еріп, жердің тоңы әлі қатты болғандықтан, су тасыған болатын. Биіктігі 3-5 см шамасында болған.
Дерек белгілі болған сәттен бастап жергілікті атқарушы органдар мен аудандық Төтенше жағдайлар департаментінің бірлескен әрекеті арқасында су деңгейін төмендету бойынша жұмыстар атқарылған.
Нәтижесінде 13 қаңтар күні сағат 02:00-де су нөпірі тоқтап, арнайы аршылған арнамен Билікөлге құя бастады.
Талас ауданы Берікқара ауылдық округінің әкімі елдімекендегі аулаларды түгел аралап, тексерді. Анықталғандай, еріген қар суы ауылдағы 3 ауланың қорасына ғана кірген. Тұрғын үйлерге қарай су жайылмаған.
Comments are closed.