- Advertisement -

Жаңа орталық жұмысын бастады

45

- Advertisement -

Қазақстан Республикасы Әлеуметтік кодексін іске асыру шеңберінде биыл 1 шілдеден бастап еліміздің облыс орталықтары мен мегаполистерінде 20 еңбек мобильділігі орталығы құрылды, ал жұмыс істеп тұрған халықты жұмыспен қамту орталықтары мансап орталықтары болып қайта құрылуда.

Осыған байланысты Жамбыл облысы әкімінің №110 қаулысы негізінде «Жамбыл облысы әкімдігінің жұмыспен қамтуды үйлестіру және әлеуметтік бағдарламалар басқармасының Еңбек мобильділігі орталығы» коммуналдық мемлекеттік мекемесі құрылды. Аталған қаулымен орталықтың Жарғысы бекітіліп, ол Әділет департаментінде тіркеуден өтті. Сөйтіп, орталық директоры болып Серік Алибеков тағайындалды.

Еңбек мобильділігі орталығының негізгі жаңа функциялары төмендегідей:

– жұмыс күшіне сұраныс пен ұсынысты талдау, болжау негізінде өңірдің еңбек ресурстарының теңгерімін қамтамасыз ету;

– өңірлік жұмыспен қамту карталарын әзірлеу және оларды жергілікті жерлерде іске асыруды үйлестіру;

– жұмыспен қамтудың белсенді шараларын іске асыру;

– өңірде іске асырылатын барлық мемлекеттік бағдарламалар мен жеке бастамалар шеңберінде ашылатын жұмыс орындарының құрылуына мониторинг жүргізу;

– жұмыспен қамтуды қамтамасыз ету мақсатында азаматтардың ерікті көші-қонына жәрдемдесу және азаматтарды көшіру бағдарламаларын өңірлік деңгейде үйлестіру;

– жұмыс іздеуші ретінде жүгінген және жұмыссыз адамдарды тіркеу және оларды жұмыспен қамту шараларын қабылдау;

– халықты, жергілікті атқарушы органдарды және уәкілетті мемлекеттік органды өңірлік еңбек нарығының жай-күйі туралы хабардар ету.

Орталық осы функцияларды іске асыру үшін қала және аудан аумағында жұмыс істейтін еңбек нарығының барлық институттарын белсенді түрде тартатын болады. Ол үшін азаматтардың нысаналы топтарын жұмысқа орналастыруға байланысты жекелеген функцияларды аутсорсингке беру құқығы беріледі.

Өз кезегінде қала мен аудандардағы халықты жұмыспен қамту орталықтары таратылып, олардың орындарына Еңбек мобильділігі орталығының филиалдары ретінде қалалық және аудандық мансап орталықтары құрылды. Жаңа орталықтың негізгі міндеті ұлттық еңбек нарығының көрсеткіштерімен ұштастыра отырып, жергілікті ерекшеліктерді ескеріп, өңірлік жұмыспен қамту саясатын іске асыру болып табылады.

Бұл ретте қазіргі уақытта жұмыспен қамтуға жәрдемдесу, ерікті түрде қоныс аудару, атаулы әлеуметтік көмек тағайындау бойынша іс-макеттерін қалыптастыру бойынша көрсетілетін қызметтердің барлық спектрі сақталады және оларды көрсету сол мекенжайлар бойынша орналасатын мансап орталықтарында жалғаса береді.

Бұл трансформация жұмыспен қамту қызметін жүйелі түрде қайта құруға, жұмысты жақсартуға және мемлекет көрсететін еңбек делдалдығы бойынша қызметтердің сапасын арттыруға бағытталған қызмет көрсету жүйесін одан әрі дамытуға мүмкіндік береді. Жұмыспен қамту саласындағы барлық қызметтер мен қолдау шаралары толық цифрландыру жүйесіне көшеді.

 

Еркін КЕЛЕСОВ,

облыс әкімдігі жұмыспен қамтуды үйлестіру және әлеуметтік бағдарламалар басқармасының басшысы

Comments are closed.

Page Reader Press Enter to Read Page Content Out Loud Press Enter to Pause or Restart Reading Page Content Out Loud Press Enter to Stop Reading Page Content Out Loud Screen Reader Support