Өзін мақтаған ақымақ. Қатыны мен баласын мақтағанды да сол маңайда деп біліңіз.
***
Момын еркекке қақатұяқ қатынның тап болуы – заңдылық сияқты.
***
Жағымпаз-жылпос барлық жерден өтеді. Соларды, біле тұрып, өткізіп жіберетініміз – өкінішті-ақ.
***
Әйел ашынса, өшіксе – қылмыстың қандай түріне болса да барады.
***
Қылмысын мойындамауға келгенде әйел еркектен өтіп кетеді.
***
Редакциялардың маңында «бұзау-автор» дегендер жүреді. Олар түкке татымайтын хабар-мақаласымағын ұсынып, емініп жүріп бәрібір өткізеді.
***
Ақылды қария жасым үлкен екен деп, орынсыз кимелей бермейді.
***
Ләжі болса біреудің кемшілігін бетіне басып әуре болмаған жөн. Сен айтты екен деп, ол бәрібір түзеле қоймайды.
***
Жалғанды басып ер де өтеді, ез де өтеді. Бірақ ездің өткен жолы ескерусіз кетеді.
***
Жақсы әйелден асар байлықты іздесең таппайсың.
***
Ажал да бәтуасыз, келмей қоймайды.
***
Өлімнің жақсы-жаманы жоқ. Десе де, бақилыққа жақындарыңды да қинамай, өзің де азап көрмей кеткенге не жетсін, егер талқаның таусылғаны рас болса.
***
Аурудың мақтаулысы болмайды, бірақ ең жаманы – қос шырағыңнан айрылып, түрт те қаш соқыр болу.
***
Көршісінің тамағы тойса, қызғаншақтың іші удай ашиды, өкпесі қысылады.
***
Мансабы өскеніне қуанбайтын адам болмайды.
***
Асыл сөз асыл адамнан ғана шығады.
***
Көп жасағанның бәрі бірдей құрметті қария емес – қазыналысы да, қазымыры да болады.
***
Қартая білу де өнер.
***
Жексұрын адамның сөзі алтын болса да іске алғысыз.
***
Пендеге бұ дүниеде мақтау тым аз бұйырады, ал өзі мақтанам десе, оған шек жоқ. Өлшем – ар-ожданы.
***
Еңбекті жаман дейтін адам аз, бірақ бәрі бірдей оған құлықты емес.
***
Мінезі тіпті де оңып тұрмаған адамның өзі басқаның мінезінен мін іздейді.
***
Ұстамдылық – арымайтын атың, тозбайтын тоның.
***
Журналист екенсің – ізденімпаз бол, өмір тынысынан бейхабар қалуға құқың жоқ.
***
Момын мас күнінде де момын. Бұзық та солай. Ал боқтампаз бұрынғысынан да құтыра түседі.
***
Айтарлық дарын-таланты болмаса да шыдамдылықпен түртініктей берген жан ғалым атанады.
***
Қасиет қанмен беріледі.
***
Тектілік қайткенде де жалғасын тауып жатады.
***
Өзінің ұлылығын сезетін адам кеуде қақпайды.
***
Табиғи данышпандық біліммен шыңдалады.
***
Сенім – адамды жігерлендіреді.
***
Ырымшыл болмаған дұрыс. Ол санаңда тереңдеген сайын ырқына ала береді.
***
Білімді адам тағы да біле берсем-ау деген «қомағайлығын» қоймайды.
***
Бірер рет күйеуге тиіңкіреп-тиіңкіреп алғаннан соң да қайта қыз қалпына түсіп жүре беретін бикештер көбейіп барады бұ заманда.
***
«Жаманнан жақсы туар, адам айтса нанғысыз, жақсыдан жаман туар, көк тыйынға алғысыз» дейді халық мәтелі. Ол – рас. Бұған мың-сан мысал келтіруге болады.
(Жалғасы бар)
Баттал ЖАҢАБАЙҰЛЫ
Comments are closed.