Елбасы Н. Назарбаев осы-дан бірер жыл бұрын «Жаңа онжылдық – жаңа экономикалық өрлеу – Қазақстанның жаңа мүмкіндіктері» атты Жолдауында елде бұқаралық спортты дамыту үшін бірлескен іс-шараларды анықтап, нақты жүзеге асыруды тапсырып, қазақстандықтардың 30 пайызын бұқаралық спортқа тарту қажеттігін баса айтқаны белгілі. Бұл меже орындалатын күн де алыс емес. Былтырдың өзінде елімізде спорт және дене шынықтырумен айналысатындардың саны 3 миллион 900 мыңға дейін жетіпті. Бұл туралы Орталық коммуникациялар қызметінің брифингінде Спорт және дене шынықтыру істері агенттігінің төрағасы Тастанбек Есентаев мәлімдеді. Агенттік төрағасы Елбасының жан-жақты қолдауымен жүргізіліп жатқан шаралардың арқасында елімізде соңғы 5 жылда спортпен шұғылданатындардың саны өскенін айтты. 2007 жылы олардың саны 2 миллион 300 мың адамды құрап, 15 пайызға артқан екен. Ал былтыр бұл көрсеткіш 3 миллион 900 мың адамға жетіпті, яғни 23,2 пайызға өсіпті. Т. Есентаев келтірген дәйектерге сүйенсек, еліміздегі 440 мың мүмкіндігі шектеулі жанның 210 мыңы спортпен шұғылданатын көрінеді. Ол үшін барлық өңірлерде тиісті жағдайлар жасалып, оларға қолдау көрсету мақсатында спорттық орталықтар ашылған.

Ардақ Үсейінова, «Ақ жол».