Бүгін Елбасы Нұрсұлтан Назарбаев Астана күнін мерекелеудің басталғанын білдіретін Мемлекеттік туды көтеру салтанатты рәсімінде дәстүрлі түрде еліміздің жоғары әскери оқу орындарын үздік бітірген түлектерге офицерлік шенін тапсырды.

Атап айтқанда, ҚР Қарулы Күштерінің Жоғарғы Бас қолбасшысы Н. Назарбаев Радио-электроника және байланыс әскери инженерлік институтының түлектеріне, Құрлық әскері әскери институтының түлектеріне, ҚР ҰҚК шекара қызметі академиясының түлектеріне, ҚР ТЖМ Көкшетау техникалық институтының түлектеріне, ҚР Ұлттық Ұлан әскери институты түлектеріне офицер погонын тапсырды. «Әр уақытта байрақ Қарулы Күштердің бағалайтын рәмізі болып саналады. Сондықтан жас курсанттарға осы жерде алғашқы әскери шен тапсыру символының мәні өте зор. Қасиетті Атамекеннің төріне тігілген Мемлекеттік Ту алдында офицер атану ерекше құрмет. Елді қорғау - өз ата-анаңды, жанұяңды, бала-шағаңды, туған-туысқандарыңды қорғау. Сондықтан сіздерді мемлекет оқытып, осындай дәрежеге жеткізіп, сардар офицер етіп тәрбиелеп, шен беруге жеткізіп отыр», - деді Елбасы лейтенант шенін беру барысында.

Ақпарат көзі: www.kazinform.kz