Бүгін ЭКСПО-қалашығының құрылысымен танысқан Президент Нұрсұлтан Назарбаев халықаралық көрме қонақ үйлерін қазақстандықтарға арналған тұрғын үй ретінде пайдалануды тапсырды.

«Біздің міндетіміз - ЭКСПО-дан кейін барлық осынау ғимараттарды одан әрі пайдалануды ойластыру. Бастапқыда қонақ үй ретінде берілетін барлық тұрғын үйлер кейіннен қалалықтар үшін, қазақстандықтар үшін пәтер ретінде пайдаланылуы тиіс.  Барлық сауда ойын-сауық және ғылыми орталықтар кәдеге жаратылуы қажет», - деді Н.Назарбаев.

Осы ретте Елбасы басқа елдердің көрмеге қажетті ғимараттарды салғанын, ал шара өткеннен кейін аталған нысандардың әлі күнге дейін қаңырап бос тұрғандығын ескертіп өтті.

«Біз салған нысандардың барлығының одан әрі пайдаланылуына сен жауап беретін боласың», - деді  Мемлекет басшысы «Астана ЭКСПО-2017» ҰК» АҚ басқармасының төрағасы Т.Ермегияевқа.

ҚР Президентінің атап өтуінше, бұған қоса қаланың барлық тұрғындарын дайындап, қонақтарға қызмет көрсету саласын жақсарта түсу қажет. «Сонымен қатар біз қонақтарға ұлттық мәдениетімізді көрсетуіміз керек», - деді Н.Назарбаев.

Ақпарат көзі: www.kazinform.kz