Мемлекет басшысы Нұрсұлтан Назарбаев елімізге жұмыс сапарымен келген Иордания Королі Абдалла II-мен кездесті. Бұл туралы Ақорданың баспасөз қызметінен хабарлады. Кездесу барысында сауда-экономикалық, инвестициялық, ғылыми-техникалық және мәдени-гуманитарлық салалардағы екіжақты ынтымақтастықты одан әрі дамыту  перспективалары талқыланды. Нұрсұлтан Назарбаев пен Абдалла II халықаралық күн тәртібіндегі өзекті мәселелер жөнінде де пікір алмасты. Қазақстан Президенті екі ел және олардың көшбасшылары арасында өзара сенімге негізделген жақын қарым-қатынас қалыптасқанын айтты. Бұл ретте ол Иорданияның  жалпы Таяу Шығыста маңызды рөл атқаратынын атап өтті. Абдалла II Қазақстанға келуге шақыртуы үшін алғысын айтты, сондай-ақ еліміздің көп жылдар бойғы, соның ішінде сириялық босқындар мәселесі бойынша көрсеткен қолдауы үшін Нұрсұлтан Назарбаевқа Иордан халқы атынан ризашылығын білдірді. Екі мемлекет көшбасшылары өзара ықпалдастықтың әлеуетін жүзеге асырудың маңыздылығын атап өтіп, осы бағытта басымдығы бар бірқатар шараларды қарастырды.

Ақпарат көзі: www.kazinform.kz