«Мангуст» трекері өте берік: сынбайды және су астында да жұмыс істейді, энергияға тиімді (бір рет толтырған қуаты 20 күнге дейін жетеді), өте ықшам, қауіпсіз. Әлемнің ұялы байланыс бар кез-келген жерінде жұмыс істейді. Жоғары дәлдікке ие. Бұған дейін жасалған GPS-жүйелеріне қарағанда, сауда орындары мен жертөлелерде координаттарды жоғары дәлдікпен жеткізеді. Қарапайым, сол себепті де мүгедек жандар да пайдалана алады

Қазір Сан-Франциско қаласындағы Аутист-балалар қауымдастығынан үлкен көлемде тапсырыс бар. Ал елімізде сәлемдемелердің жеткізілуін қадағалап отыру үшін «Қазпошта» АҚ құралға тапсырыс берген. Бұл отандық GPS-қауіпсіздік жүйесі тек Қазақстанда ғана емес, сондай-ақ халықаралық нарықта бірегей өнім болып табылады.

Жобаның құны – 18,8 млн теңге. Оның 90%-дан астамын, яғни 17,7 млн теңгесін «Технологиялық даму жөніндегі ұлттық агенттігі» АҚ қаржыландырған.

Бір кезде баласынан көз жазып қалған Евгений Щербатовқа өміріндегі сол ұмытылмас оқиғасы осынау құралды жасауына түрткі болған. Трекер жаппай саудаға шығарылмаса да, қазірдің өзінде өзі секілді ата-аналар қызығушылық танытқан. Евгенийдің айтуынша, «Мангуст» құралын жасауға 600-ден астам адам өтініш берген, деп хабарлады ұлттық агенттіктің баспасөз қызметі.

Ақпарат көзі: Stan.kz