Биылдан бастап мемлекеттік ЖОО ректорлар сайлау арқылы тағайындалады, деп хабарлайды Baq.kz тілшісі. Бұрын жоғарғы оқу орындарының басшылары ҚР Білім және ғылым министрінің шешімімен тағайындалатын. Бұдан былай ашық конкурс түріндегі іріктеуді ғалымдар, бизнес, жергілікті атқару органдары және қоғам өкілдерінен құралған университеттің Қадағалау кеңесі өткізеді.

 Ректорлыққа үміткерлерді іріктеудің негізгі қағидаларына толықтай сай келіп, университеттің даму бағдарламасын ұсыну міндеттеледі. Үміткер мақұлданған соң, Қадағалау кеңесі өз шешімін Республикалық конкурстық комиссияға жолдайтын болады. Қадағалау кеңесі қолдаған үміткерлер саны үш адамнан кем болмауы тиіс. Алғашқы іріктеуден кейін үміткерлер ҚР Премьер-министрінің әлеуметтік мәселелерді қадағалайтын орынбасарының жетекшілігіндегі Республикалық комиссияда әңгімелесуден өтіп, алқалы негізде соңғы шешім қабылданады.