Кішкентай қадамдар – тұрақтылықтың негізі

Дамуды бірден тау қопарудан бастау міндетті емес. Үлкен мақсаттар көбіне адамды сескендіріп, бастамай жатып шаршатып тастайды. Ал кішкентай қадам – бұл күнделікті өмірде еш қиындықсыз орындай алатын, бірақ жүйелі түрде жасалатын әрекет. Кез келген өзгерістің артында үлкен мақсат тұруы тиіс. Өзіңізден сұраңыз: «Мен не үшін дамығым келеді?». Мүмкін, бұл алдағы маңызды емтихандардан сүрінбей өту шығар? Немесе жаңа тілді меңгеріп, әлемді тану, жаңа орта қалыптастыру мақсаты болар? Егер сізде нақты «Не үшін?» деген жауап болса, кішкентай қадамдарды орындау ерік-жігерді қажет етпейтін жағымды әдетке айналады. Әрбір кішкентай жеңіс – «Менің қолымнан келеді» деген сенімді нығайтатын кірпіш.

Әдет өзгерсе – өмір өзгереді

Бір күні артқа қарағанда, сіз өзіңіздің бұрынғы болмысыңыздан мүлде басқа, тұлғалық тұрғыда өскен адамға айналғаныңызды байқайсыз. Бұл өзгеріс бір түнде болған керемет емес, бұл – күн сайын жасалған дұрыс таңдаулардың жемісі. Біздің тағдырымыз–біздің әдеттеріміздің жиынтығы. Егер біз бос уақытты пайдалы іске алмастыра алсақ, болашағымызды бүгіннен бастап құра аламыз. Қоғамның өзгеруі әр адамның өзін тәрбиелеуінен басталады.

Білімді, саналы әрі жауапкершілігі бар жеке тұлғалар көбейген сайын, мемлекет те, ұлт та алға жылжиды. Өзіңді дамыту – тек өзіңе ғана емес, айналаңа, еліңе жасаған ең үлкен жақсылығың. Біле білсеңіз, бүгін жасаған кішкентай ғана қадам – ертеңгі үлкен жеңістің іргетасы. Сол қадамды дәл қазір жасаудан қорықпаңыз. Өзгеріс – сіздің қолыңыз.

Әмина ЕЛШІБЕК

А.Байтұрсынұлы атындағы мектеп-гимназиясының 11-сынып оқушысы.

Талас ауданы