Бүгінгідей мың құбылмалы әлемде «Заң мен тәртіп» қағидаты – қауіпсіздіктің шынайы кепілі бола алатыны рас. Демек, сіз бен біз үшін өскелең ұрпақты осы бастан жауапкершілікті сезінуге және қоғамдық тыныштықты сақтауға даярлау аса маңызды. Дәл осы мақсатта жуырда Жамбыл ауданындағы Әзімбек Исмаилұлы атындағы орта мектепте Халық Қаһарманы Ғазиз Байтасов атындағы «Жас сақшы» сыныбы салтанатты түрде ашылды.
Естеріңізде болса, осы полиция капитаны 2011 жылы бейбіт тұрғындардың қауіпсіздігін қамтамасыз ету жолында құрбан болған еді. Батырдың атындағы сыныптың ашылуына аудан әкімінің орынбасары Мақпал Досымбекова, аудандық полиция бөлімінің бастығы, полковник Дәурен Сапиев, аудандық прокуратураның аға прокуроры Арманжан Әбдібеков, сондай-ақ ауыл тұрғындары мен мектеп оқушылары қатысты.
Жиын барысында құқық қорғау органдарының өкілдері «Жас сақшы» сыныбының ашылуы – өскелең ұрпаққа тәлім-тәрбие беруде айрықша маңызға ие екенін атап өтіп, мектеп оқушыларының бойына бала кезден отансүйгіштік, тәртіп пен жауапкершілік құндылықтарын сіңіру қашанда өзектілігін жоймайтынын баса айтты. Сондай-ақ іс-шарада оқушыларға ел қауіпсіздігі жолында жанын пида еткен Халық Қаһарманының өмір жолы мен қызметі жөнінде мол мағлұмат берілді.
Мұнан соң аудандық полиция бөлімінің бастығы, полковник Дәурен Сапиев оқушыларды «Жас сақшы» қатарына қабылдау рәсімін өткізіп, жас өрендер адал болуға, әрқашан батыл да жауапты азамат болуға ант берді. Жиын соңы оқушылардың дайындаған концерттік бағдарламасына ұласты.
Есен ӨТЕУЛІ
Ұқсас жаңалықтар
