Кеште студент жастар Тәуелсіздік тақырыбындағы, Желтоқсан оқиғасына қатысты танымал ақындардың жырларын жатқа оқыды. Жыр шеруге желтоқсан оқиғасының тікелей куәгерлері шақырылып, оларға құрмет көрсетілді. Олар көңілдеріндегі толғанысқа толы естеліктерімен, сол кезеңнің ауыр да азапты шындығымен бөлісті. Атап айтқанда, «Жамбыл облысы Желтоқсан-86» қоғамдық бірлестігінің төрағасы, Қалалық маслихат депутаты, №2 арнаулы әлеуметтік қызмет көрсету орталығының директоры Мұрат Бердалиев жастардың алдында ағынан жарылды.

«Сол жылдар біз сіздердей студент едік. Бірақ, қағажу мен қорлықты, кемсітуді көп көрдік. Біліміміз жетіп тұрса да жүрегіміз қалаған конференцияларға делегат бола алмадық. Талантымыз жетіп тұрса да, чемпион бола алмадық. Себебі, барлық мәселе Мәскеу арқылы шешілді. Ол жағдай қазақ жастарының ашуын тудырып, осындай бір ызаның «бұрқ» етіп жарылатын сәтіне жақындатып келе жатқан еді. Сол көрсетілуі тиіс қайсарлықты қазақ жастары желтоқсан көтерілісінде көрсетті. Ол – сіздер қызығын көріп отырған бейбіт күннің, азаттықтың арайлы таңының бастауы болды», – деді ол.

Жиынға қатысушылар Тәуелсіздіктің баға жетпес құндылық екенін атап өтіп, мұндай рухани кештердің қоғам үшін маңызы зор екенін жеткізді. Аталған қоғамдық бірлестік төрағасының орынбасары, желтоқсаншы Света Иманқұлова желтоқсан тақырыбын зерттеп жүрген ізденуші Құттыбек Әшірхан да әсерлі сөздерімен ортаға ой салды.

Басқосуды аталған кітапхана директоры, Тараз қалалық мәслихатының депутаты Эльмира Әбдинова қорытындылап, кештің жастарға берер тағылымы мол екенін айтып, қонақтарға алғысын білдірді.

Есет ДОСАЛЫ