Өңірлік коммуникациялар қызметі алаңында өткен баспасөз мәслихатында облыс әкімдігі энергетика және тұрғын үй-коммуналдық шаруашылық басқармасының басшысы Ғалым Исақов осы жылдың екінші жартыжылдығында елді мекендерді таза ауыз сумен қамту бойынша жүргізілген құрылыс жұмыстарының барысымен таныстырды.
Мемлекет басшысының тапсырмасына сәйкес елді мекендерді толық таза ауыз сумен қамтамасыз ету мақсатында биыл бюджеттен 13,9 миллиард теңге бөлініп, 24 ауыл мен 9 тұрғын алқапта (Тараз – 5, Шу – 4) құрылыс жұмыстары жүргізілуде. Бөлінген бюджет қаржысының 11,1 миллиард теңгесі игерілген.
– Бүгінде орталықтандырылған таза ауыз су құбырын жүргізу бойынша 19 елді мекенде және 5 тұрғын алқаптың құрылыс жұмыстары толық аяқталып, тұрғындар сапалы ауыз сумен қамтамасыз етілді. Сондай-ақ 3 елді мекен мен 4 тұрғын алқаптың құрылыс жұмыстары аяқталып, нысандарды қабылдау-тапсыру жұмыстары жүргізілуде. Қалған 2 нысандағы құрылыс көлемі 90 пайызға дейін аяқталып отыр. Жалпы барлық нысандардағы құрылыс жұмыстары тұрақты бақылауда. Жыл соңына дейін барлық нысандардағы құрылыс жұмыстарын аяқтап, тұрғындар 100 пайыз сапалы ауыз сумен қамтылатын болады, – дейді Ғалым Исақов.
Баспасөз мәслихаты соңында басқарма басшысы Ғалым Исақов бұқаралық ақпарат құралдары өкілдері қойған сұрақтарға жауап берді.
Марат ҚҰЛИБАЕВ
Ұқсас жаңалықтар
