«Ел болам десең, алдымен бесігіңді түзе» деп бекер айтылмаған. Әрине, бүгінгі бала – болашақта ел тұтқасын ұстар азамат. Сондықтан да бала тәрбиесінің маңызы зор. Бала бойына туған халқына ерінбей еңбек етіп, ел мүддесі үшін аянбай ерлік көрсетудің абыройлы міндет екенін сіңдіріп өсіру – кемел келешектің кепілі. Жеткіншектерді өз халқына адал қызмет етіп, еңбектенуге және Отан алдындағы перзенттік парызын ұғындыра тәрбиелеуді басты мақсат тұтқан Жамбыл ауданының Қ.Сартбаев атындағы орта мектебінің ұстаздары мектептен тыс жерлерге пайдалы экскурсиялар да ұйымдастырып тұрады.
Осындай мақсаттағы экскурсияны жақында осы мектептің алғашқы әскери және технологиялық пәнінің жетекшісі Жалғас Исақов 10 «А» сынып оқушыларымен ұйымдастырды. Жеткіншектерді М.Х. Дулати атындағы Тараз университетінің әскери кафедрасына алып барған мұғалім оқушыларын ондағы түрлі қару-жарақтармен, әскери тәртіппен таныстырды.
– Еңбек пен ерлік қатар ұғым. Балаларды еңбекқорлыққа баулумен туған елінің мүддесі үшін кез келген жағдайда ерлік көрсетуге тәрбиелей аламыз. Ерлік тек майданда ғана болмайды. Отаны үшін аянбай еңбектену де ерлікке баланады. Мектебіміздің жоғары сынып оқушыларын университеттің әскери кафедрасына экскурсияға апарып, ондағы барлық техникалармен таныстыруға көмектескен М.Х. Дулати атындағы Тараз университетінің «Алғашқы әскери дайындық» кафедрасының аға оқытушысы Абу Мұхтар Кенжеғалиұлына оқушыларымыздың атынан алғыс айтамын. Сонымен қатар оқушыларды жанжақты тәрбиелеуге қажетті іс-шараларды ұйымдастыруға үнемі қолдау көрсетіп отыратын мектебіміздің директоры Сабыр Мұраталиевке ризашылығымызды білдіреміз. Оқушыларымыз университеттің әскери кафедрасында АК74 Калашников автоматын бөлшектеп, шашып, жинады және атып, жаттықты, – дейді Қ. Сартбаев атындағы орта мектебінің мұғалімі Жалғас Рәпілбекұлы.
Айта кетелік, 10 «А» сынып оқушылары өнер-білімге құштар, еңбекқор, мектептің өзге де қоғамдық жұмыстарында өте белсенді. Олар әскери кафедрада өткен экскурсияда ондағы оқытушылардың берген мәліметтерінен біраз нәрсе үйреніп, тәжірибе алғандарын айтты. Бұл іс-шара мектеп ұжымының тәрбиелі де білімді тұлға жетілдіруде бір-бірімен тығыз байланыста жұмыс істейтіндерін аңғартты.
Қамар ҚАРАСАЕВА
Жамбыл ауданы
Ұқсас жаңалықтар
