Адамзат баласының іргетасы – тәрбие десек, артық айтқандық емес. Қай халық болсын, саналы ұрпағының қалыптасуына, тәрбиесіне ерекше мән беріп, оны ұлттың баянды болашағымен байланыстырған. Қазақтың «Баланы жастан» деген нақыл сөзінде терең астар жатыр. Ал сол ұрпақтың бойына адамгершілік қасиеттерін сіңіру, саналы азамат етіп қалыптастыру ең алдымен отбасынан басталады. Себебі бала – ақ қағаз, ал ата-ана – сол қағазға не жазылатынын анықтайтын алғашқы ұстаз.
Бүгінгі бала – болашақтағы елдің тірегі. Бүгін біз қалай жас ұрпақты қалыптастырсақ, ертең сол ұрпақ еліміздің бет-бейнесін қалыптастырады. Болашағында еліне елеулі, халқына қалаулы азамат болуы үшін, олардың санасына сапалы ой мен көзқарас қалыптастыруға әр жанұя үлесін қосуы тиіс. Себебі талай асулардан өтіп, биік белестерді бағындырған әрбір тұлға өз елінің айнасы іспетті.
Қазіргі күнде бала тәрбиесі бұрынғыдан күрделірек. Қоғам өзгерді, ақпарат көбеюде, балалардың санасы да тез жетіліп, өзгеше қалыптасуда. Әлеуметтік желі, түрлі көзқарастар, ақпарат ағыны бала санасына ерте ықпалын тигізеді. Ақпарат ғасырында дүниеге келген бүлдіршіндер технологиямен етене жақын, жан жақты, ізденімпаз.
Алайда осындай өзгермелі заманда олардың ішкі әлемі мен рухани тәрбиесіне жеткілікті көңіл бөлмеу қаупі де бар. Сондықтан әрбір ата-ана, әрбір ұстаз баланың тек білімін ғана емес, рухани қасиетін де қатар тәрбиелеуі қажет. Өйткені ел тірегі болу үшін ілім де, тәрбие де қатар жүруі тиіс.
Тәрбие дегеніміз – үнемі ақыл айту емес. Бұл баланың жан дүниесіне жол тауып, тек сөзбен емес, іспен үлгі көрсету. Баланың тұла бойына ізгілік дәнін егу үшін құрғақ кеңестен бұрын, шынайы, сабырлы қарым қатынас пен мейірім керек. Кейде үнсіз жасалған әрекет-жүз сөзден артық әсер етеді. Себебі бала тыңдағаннан бұрын көргенін қайталайды. Сондықтан жақсы тәрбие – ұлағатты өмірдің өзінен өріледі.
Тәрбие бір күнмен, бір сөзбен шектелмейді. Ол – үздіксіз жүретін өмірлік үдеріс. Әр күн сайын бала бір ой түйіп, көргенін бойына сіңіріп отырады. Ата-ана өз өмірі арқылы баласына үлгі бола білуі қажет. Өйткені баланың өміріндегі ең үлкен ұстазы ата-ананың өмірі.
Еліміздің ертеңі – жастардың қолында. Бүгінгі жас буын қандай тәрбие алып, түзу бағытпен өссе, болашақ соған сай қалыптасады. Сол себепті жастарды қолдау, оларға дұрыс жол сілтеу – әрбір елдің стратегиялық міндеті.
Ендеше жастардың талабын қолдап, рухын оятып, болашағына сеніммен қарау – баршаның парызы.Балаға берілген бір тамшы мейірім – болашаққа құйылған дариядай.Тек сол мейірімнің арнасы ешқашан суалмасын!
Айдина ХАБИБУЛЛА,
№3 мектеп-лицейінің оқушысы.
Тараз қаласы
Ұқсас жаңалықтар
