Халықаралық балалар кітабы күнінде облыс орталығындағы Оқушылар сарайында кітап оқуға шақырған үлкен іс-шара өтті. Д.А.Қонаев атындағы облыстық балалар мен жасөспірімдер кітапханасы «Оқуға құштар жүректер» атты облыстық байқауын «Әулиеата – кітап оқитын өңір» жобасы аясында ұйымдастырды. Байқау қазақ балалар әдебиетінің көрнекті өкілдері Сапарғали Бегалиннің 130, Өтебай Тұрманжановтың 120, Сансызбай Сарғасқаевтың 100, Асқаржан Сәрсектің 75 жылдығына арналды.
Байқау бірнеше кезеңнен тұрды, әр кезеңде қатысушылар өз білімдері мен шығармашылық қабілеттерін көрсетті. Байқаудың аудандық кезеңі ақпан айында өтіп, 8 ауданның үміткерлері облыстық кезеңге жолдама алған. Байқауға 10 үміткер қатысты.
Балаларды кітапқа қызықтырған сөз өнерінің сайысы «Ерке» өнер дамыту орталығының «Джаз» биімен ашылды. «Smart» өнер мектебінің оқушысы «Молдабайдың әнін» орындаса, Бауыржан Ақтаевтің «Алаш аманаты» атты «Талас домбырашылар» ансамблі күй тартып, KZ ELEMENT өнер орталығының «Ақ құс» триосы «Отан», «Ләйлім» әндерімен іс-шараның мәнін аша түсті.
Сайыстың барлық сындарынан сүрінбей өткен Шу ауданының оқушысы Әсел Нұржанқызы бас жүлдені жеңіп алды. Ал, І орынды Байзақ ауданынан келген Арина Алыбаева, ІІ орынды Т.Рысқұлов ауданының балдырғаны Ясмина Балтабай, ІІІ орынды мойынқұмдық Жұлдыз Достай олжалады. Тағы бірқатар жас оқырмандарға ынталандыру сыйлықтары табысталды.
Айта кетейік, бұл мерекені 1967 жылы «Балалар мен жасөспірімдер әдебиеті жөніндегі халықаралық кеңес» коммерциялық емес ұйымы бекіткен. Бұл күн кездейсоқ таңдалмаған. Мереке тарихта есімі қалған, ең танымал ертегіші Ханс Кристиан Андерсеннің туған күніне орайластырылған. Балалар әдебиеті – көркем әдебиеттің ауқымды саласы. Қазақ жазба әдебиеті қалыптасқаннан бері балалар әдебиеті – тілі, стилі, мазмұны мен құрылымы жағынан ұлт тарихындағы үлкен маңызға ие. Елімізде балаларға арналған 200-ден аса кітапхана бар.
Қамар ҚАРАСАЕВА
Ұқсас жаңалықтар
