Көкдөнен ауылдық мәдениет үйінде ұйымдастырылған бұл кеш – өнерге деген шексіз сүйіспеншілік пен үлкен еңбектің нәтижесін көрсетуге арналған маңызды іс-шара болды. Өнер мектебі ұжымының есеп беру кешіне ауданның құрметті азаматтары, қоғам белсенділері, ата-аналар және ауыл тұрғындары қатысты.

Кешке аудан әкімінің орынбасары Қайрат Исмаил, аудандық ардагерлер кеңесінің төрағасы Қожайхан Бижанов, аудандық аналар кеңесінің төрайымы Түзел Алагозова, кеңес төралқа мүшесі Есенкүл Мұхтарова, Көкдөнен ауылының қоғамдастық кеңесінің төрағасы Карвоз Агибаев, аудандық білім бөлімінің сектор меңгерушісі Бауыржан Самылтыров, Көкдөнен ауылдық округінің әкімі Төлеген Атабаев қатысты. Олар жас өнерпаздардың шығармашылығына жоғары баға беріп, ізгі лебіздерін білдірді.

Кештің басты мақсаты – жас таланттардың өнерін халыққа таныстыру, олардың шығармашылық әлеуетін қолдау. Әсем әндер, жүректі тербеген күйлер, сахналанған көріністер, қолөнер туындылары мен бейнелеу өнерінің үздік жұмыстары көрермен назарына ұсынылды. Сахнаға шыққан әрбір өнерпаз өз дарынымен көрермендерді тәнті етіп, үлкен қошеметке ие болды.

Көрмеге қойылған жас суретшілер мен қолөнер шеберлерінің жұмыстары да жоғары бағаланды. Театрландырылған қойылымдар ұлттық құндылықтарды дәріптеп, көрерменнің рухын көтерді. Әсем әндер мен күмбірлеген күй кештің көркін қыздырып, жиналған қауымға ұмытылмас әсер сыйлады.

Бұл кеш тек есеп беру концерті ғана емес, өнерге деген адалдықтың, талмай ізденудің және үлкен шығармашылық жолдың жарқын көрінісі болды. «Өнер – өмір айнасы» демекші, осындай кештер әлі де талай жанның жүрегіне жылулық сыйлап, жас таланттардың бағын ашатыны сөзсіз.

Өнер мектебінің педагогтері балалардың шығармашылық қабілеттерін дамытуға зор үлес қосып келеді. Бұл кеште шәкірттердің бойындағы талантты шыңдап, оларға дұрыс бағыт-бағдар берудің маңыздылығы тағы да дәлелденді. Өнер мектебі – тек білім ордасы ғана емес, болашақ сахна шеберлерінің алғашқы қадамын жасаған қасиетті шаңырақ.

Сыннан сүрінбей өткен мектеп ұжымының еңбегін ерекше атап өтпеуге болмайды. Мұндағы ұстаздар тек өнерді үйретіп қана қоймай, шәкірттеріне шабыт беріп, болашаққа үлкен үмітпен қарауға баулиды.

Көкдөнен ауылында өткен «Өнерім шарықтай бер, биік шыңға!» атты есеп беру кеші – өнердің биік шыңға ұмтылатынын, дарынды жастарды қолдау маңызды екенін тағы бір мәрте дәлелдеді. Алдағы уақытта да бұл бастама жалғасын тауып, жас өнерпаздардың өрлеуіне мүмкіндік берері сөзсіз.

Назгүл САМЫЛТЫРОВА,

«Өнер» мектебі директорының оқу ісі жөніндегі орынбасары.

Т.Рысқұлов ауданы