Қасиетті Бурабайдың баурайында, көрікті Көкшетаудың төрінде Ұлттық құрылтай төртінші рет жалғасын тапты. Ұлттық құрылтайларда елдің өзекті мәселелері айтылып жүр. Бұл жолы Мәдениет және ақпарат министрі Аида Балаева басқарған «Мәдениет. Өнер. Руханият» секциясында мәдениеттің ең өзекті мәселелері айтылғаны көңіл қуантады. Мәжіліс депутаты, мәдениеттің үлкен жанашыры Аманжол Әлтай ауылдардағы мәдени ошақтардың жай-күйінің төмендігін ашып айтты. Бұл көптеген ауылдарға ортақ мәселе еді, Ұлттық құрылтай мінберінен көтерілді.
Белгілі айтыс ақыны Біржан Байтуов сырт елдерден туристер келетін орындардың ахуалын жақсарту, әсіресе, мемлекеттік тілдегі жазуларды молайтып, қазақша әндер мен күйлерді қою, ұлттық тағамдар желісін ашу мәселесін сәтті көтерді. Бұл олқылықтар Бурабайдың өзіне де тікелей қатысты болып отыр. Әрине, келешекте шешімін табар деген ойдамыз. Мәдениет ошақтарын күрделі жөндеу жұмыстарына назар аударылса, оның игілігін біздің өңірдегі шалғай ауылдар көреді деген ойдамын.
Ұлттық құрылтайда айтылған өзекті мәселелердің барлығын қолдаймын. Сол ұсыныстардың барлығы елдің дамуы мен өркендеуі үшін айтылған құндылықтар. Сондықтан, бұл Ұлттық құрылтай да өзінің жүгін жоғары дәрежеде көтерген, маңызы терең жиын болды деп бағалаймын.
Асылхан ШҮҢІРЕКОВ,
Қазақстан Республикасының еңбек сіңірген қайраткері.
Ұқсас жаңалықтар
