«Белсенді ұзақ өмір орталығы» мекемесі жұмыс істей бастағалы бері біз жұбайым Әлия Әшекеева екеуміз 2023 жылдың күзінен бері сол орталыққа келіп, ем алып, түрлі тренажерлерде жаттығып, денсаулығымызды түзеп жүрміз. Бұл жерде түрлі массаж жасау орындары, физиоемдеу бөлмелері, әртүрлі тренажерлер мен дене бұлшық еттерін қалпына келтіретін, дамытатын жаттығу құралдары бар. Тұз шахтасы, йогамен емдеу, қазақ, ағылшын тілдерін үйрену курстары, еңбек терапиясы кабинеттері жұмыс істейді. Сондай-ақ, келуші зейнеткерлердің ыңғайына қарай хор, ән айту, би билеу, қолөнер үйірмелеріне және стол теннисі, бильярд, шахмат, дойбы, тоғызқұмалақ, тағы сол сияқты ойындарға қатысып, жастық шақтарында үйренген, бірақ жасы ұлғая келе ұмыт бола бастаған өнерлері мен спорттық машықтарын еске түсіріп, ұштап жатуға мүмкіндік ашылған.
Түрлі мерекелер мен айтулы даталар қарсаңында орталықта жоғарыда аталған спорт түрлерінен жарыстар өткізіліп, өлең айту, би билеу сияқты өнерлерін ортаға салып, көңіл көтеріп жатады. Үздік шыққан жарыс жеңімпаздары дипломдармен марапатталады. Мұндай марапаттау мен қолпаштау жасы келген зейнеткерлердің көңілдерінің көтеріңкі болып, түптеп келгенде денсаулығының нығаюына үлкен әсер етуіне әкелетіні белгілі. Әрі бұл сияқты іс-шаралар келуші зейнеткерлердің бір- бірімен жақын танысып-білісуіне, өздері сияқты жасы келген замандастарымен уақытты көңілді және мазмұнды өткізуіне, соның арқасында денсаулығының жақсаруына жағдай жасайды. Өмір сүрудің мәні зейнет жасына шыққан соң тек қана үйде отырып, немерелерді бағып-қағу ғана емес, өз өмірлеріне көңіл бөліп, денсаулығын жақсарту екенін жете түсінуге әкеледі.
Сонымен қатар, мұнда дәрігерлер, психолог мамандар, медбикелер, спорттың сала жетекшілері көмек көрсетіп, бағыт- бағдар береді. Бәрі өте сыпайы, мәдениетті, өз саласының білгір мамандары. Қандай сұрақпен барсаң да түсіндіріп, үйретуден жалықпайды.
Әбдіқасым ӘЛІМХАНҰЛЫ,
қала тұрғыны, зейнеткер.
Ұқсас жаңалықтар
