Жамбыл педагогикалық институтында, кейін Жамбыл университетінде 30 жылдан астам уақыт еңбек еткен профессор Нұрғали Сарыбековтың 90 жылдығына орай, ғалымның өзі тұрған үйден мемориалды тақта ашылды. Педагогика ғылымдарының докторы, Халықаралық Акмеология және Қазақ Халық экология Академиясының академигі Нұрғали Сарыбековке арналған ескерткіш Тараз қаласының «Қаратау» шағын ауданындағы №4 үйдің қабырғасына орнатылды. Ескерткіш тақтаның ашылу салтанатына зиялы қауым өкілдері, ғалымның шәкірттері мен туыстары қатысты. Іс-шарада ғалымның перзенті, педагогика ғылымдарының докторы Махметғали Сарыбеков әкесі туралы естеліктерді әңгімеледі.
Жиын барысында экономика ғылымдарының докторы Оразалы Сәбден, ұстаз-ардагер Тұрғынбек Манапов, облыстық ардагерлер кеңесінің төрағасы Еркінбек Солтыбаев ғалым Нұрғали Сарыбековтың жайсаң мінезін, терең ізденісін еске алып, шәкіртке деген құрметі мен мансабына деген адалдығын, табиғатқа деген мейірімін сөз етті. Мемориалды тақтаның ашылу салтанатына қатысушылар Халықаралық Тараз инновациялық институты алдындағы Шерхан Мұртаза ескерткішіне гүл шоқтарын қойып, тағзым етті.
Ғалымның мерейтойына арналған іс-шара Республикалық ғылыми-практикалық конференциямен жалғасты. Академиктің ұлы Махметғали Сарыбеков конференция модераторы болып, алғашқы сөзді Парламент Мәжілісінің депутаты Ерболат Саурықовқа берді.
– «Жақсының аты өлмейді, ғалымның хаты өлмейді» деген халық нақылының нақ дәлелін көріп отырмыз. Ғалым Нұрғали ағамыздың жолын бүгінде ұлы Махметғали Нұрғалиұлы жалғастырып келеді. «Экология және табиғатты қорғау» орталығын ашып, оның негізінде өзінің ғылыми мектебін құрды. Оның тікелей басшылығымен 10-нан астам халықаралық, бүкілодақтық, республикалық ғылыми-теориялық, ғылыми әдістемелік, ғылыми-практикалық конференциялар мен семинарлар өтті. Ұстаздың сара жолын бүгінде ізбасарлары жалғап, ғалымның 90 жылдық мерейтойында бәріміз бас қосып, өзі 30 жыл өмір сүрген үйіне ескерткіш тақта қойылды. Ал, шәкірттері еліміздің өркендеуіне, жас ұрпақты оқытып, тәрбиелеуде еңбек етіп жүр. Осының бәрі де ғалымның өзі өмірден өтсе де артында өшпес ізі қалатынын айғақтайды, – деген Ерболат Байұзақұлы конференция жұмысына сәттілік тіледі.
Бұдан соң педагогика, психология, экономика, филология ғылымдарымен айналысып жүрген ғалымдар Нұрғали Сарыбековтың әр салада атқарған еңбектері мен өмір өрнектерін айтып, баяндама жасады. Аталған жиын барысында «Академик Нұрғали Сарыбековтың таңдамалы ғылыми еңбектері» атты кітаптың тұсауы кесілді. Бүкіл саналы ғұмырын табиғатты қорғауға арнаған академик Нұрғали Сарыбековтың өмір жолы, артында қалдырған ғылыми мұрасы, азаматтық ұстанымы бүгінгі ұрпаққа үлгі болары анық.
Азамат ЖАҚЫПБЕК,
М.Х.Дулати атындағы Тараз өңірлік университеті конвергентті журналистика мамандығының 2-курс студенті.
Ұқсас жаңалықтар
