Жеңіс күні мерекесінде Байзақ ауданының әкімі Бақыт Қазанбасов Жетібай ауылындағы Ұлы Отан соғысының ардагері Рахымжан Мамыралиевті шаңырағына арнайы барып, құттықтады. Мемлекет басшысы Қасым-Жомарт Тоқаевтың жолдаған құттықтау хатын табыстады. Биыл 99 жасқа жеткен қарт жауынгер 1942 жылғы 25 желтоқсанда әскер қатарына шақырылады. Мәскеу қаласының маңындағы Мытищиде алты айлық даярлық курсында зеңбірекші мамандығын игеріп, Орал өңіріндегі Костромадағы Иваново тоқыма фабрикасының іргесіндегі 357-ші зеңбірекшілер дивизиясына қызмет етуге жіберіледі.
Міне, осы сәттен Рахымжан Мамыралиевтің жауынгерлік кезеңі басталады. Алғаш Украина майданында оқ жаудырғыш-зеңбірекшілер дивизиясының командирі Иван Ильич Зоновтың қарамағында болып, көптеген соғыс алапатын басынан өткереді. Әсіресе, Польша қаласының маңындағы Лодзі қаласы үшін болған шайқаста ол ерлік көрсетеді. 1943 жылы Қиыр Шығыстың Уссурийскіде, Биробид-жанда, Приморск өлкесі мен Ворошилов қаласын, содан кейін Жапон соғысына қатысып, жаудан қорғау шараларына атсалысады. Көптеген шайқастарды бастан өткерген Рахымжан Мамыралиев 1951 жылдың қарашасында елге аман-есен оралады.
Жеңіс мерекесінде құттықтап келгендерге өзі қатысқан шайқастарды әңгімелеген соғыс және еңбек ардагері билік басындағыларға алғысын айтып, батасын берді.
Қамар ҚАРАСАЕВА
Ұқсас жаңалықтар
