Өңірімізде жылыту маусымы жақындаған сайын облыстың от жауынгерлері тыным таппай үйлерді аралап, тұрғындарға газ және пеш құралдарын пайдалану кезінде өрт қауіпсіздігі ережелерін сақтауды ескертуде. Себебі, өрттің көптеген бөлігі қысқы уақытта, яғни тұрғындар жылыту пештерін пайдалану кезінде тіркелетіндігі бүгінде ешкімге жаңалық емес. Осыған орай, 30 қыркүйекте Тараз қаласы №2 мамандандырылған өрт сөндіру бөлімінің жеке құрамы қаладағы Әуежай аймағындағы Т.Әубәкіров, Т.Бигелдинов, Т.Мұсабаев көшелерінің тұрғындарына жылыту маусымы кезіндегі өрт қауіпсіздігі шараларын сақтау жөнінде үгіт-насихат жұмыстарын жүргізді. Шара барысында барлығы 63 үй және 150-дей адам қамтылды. Айта кеткен жөн, мұндай өрт пен өзге де төтенше жағдайлардың алдын алу мақсатында өткізілетін ескерту жұмыстары облыстың барлық аудандарында белсенді ұйымдастырылуда.  

Жүрсінгүл ЖАҚЫП