Бұл туралы бүгін Киевке жұмыс сапарымен келген ҚР Президенті Нұрсұлтан Назарбаев Украина Президенті Петр Порошенкомен екіжақты кездесуі барысында айтты.

«Мен Киевке әруақытта да зор ризашылықпен келемін. Мен үшін бұл жастық шағыма оралу және бұл ғана емес. Кезінде мен металлург ретінде, кейіннен Қазақстан басшысы ретінде көптеген кәсіпорындарда болдым. Қазіргі уақытта біздер бұқаралық ақпарат құралдары арқылы сөйлесе бастадық. Дегенмен, БАҚ арқылы жүз рет тілдескеннен бір-біріміздің көзімізге қарап, бір рет жүздескеніміз жақсы», – деді Елбасы.

ҚР Президенті қиындықтарға қарамастан екі елдің арасындағы экономикалық байланыстарды қалпына келтіретін уақыттың жеткенін баса айтты. Сонымен қатар Украина Президентін елдегі қиындықтарға қарамастан Рада сайлауын өткізуімен, жаңа Үкімет жасақтауымен құттықтады. «Бұл – Президент Порошенконың бірінші үлкен жеңісі. Сонымен қатар мен толық қолдау білдірген Минск хаттамасы, Минск процесі де сіздің еңбегіңіз. Қазіргі уақытта барлығына конфронтациядан ымыраға келіп, оның негізінде экономикалық байланыстарды қалпына келтіру қажет», – деді Н.Назарбаев.