Baq.kz – Қазақстан Республикасында тіркеуге алынбаған шетелдік телеарналар көрсетілімін тоқтатуы мүмкін деп хабарлайды Tengrinews.kz ҚР Бас прокурорының орынбасары Андрей Кравченкоға сілтеме жасап. "Бізді қазір Қазақстанда таратылатын ресейлік телеарналардың жартысына жуығы құзырлы мемлекеттік органда тіркеуге алынбағандығы қатты алаңдатады. Олар ел аумағында жұмысын бастамастан бұрын сол органға келіп тіркеуге тұруы керек болатын. Қазір біз үкімет алдына осы мәселені қоймақпыз. Біздің ойымызша, Қазақстанға келіп, құзырлы органның тіркеуіне тұрм аған шетелдік телеарналар ел аумағында көрсетілмеуі керек" деді Кравченко Сенат депутаттарының сауалдарына жауап беру кезінде. Оның айтуынша, шетелдік телеарналар әдетте бар кінәні өзімізге артатын көрінеді. Яғни, таратылыммен жергілікті кәсіпкерлер айналысқандықтан біздің оған қатысымыз жоқ деп ақталады. "Аталған кәсіпкерлерге де, телеарналарға да шара қолдану керек. Осы салада тәртіп орнатамыз деп үміттенемін. Және ол тәртіпті қалай орнату керектігін біз білеміз" деді Бас прокурордың орынбасары.