"Ең бастысы, өзіміз қазақша сөйлеуіміз қажет. Бұл туралы "Хабар" телеарнасына эксклюзивті сұхбат берген Елбасы Нұрсұлтан Назарбаев айтты.

"Қазақ тілінің қолданылуы мен өркендеуі үшін мемлекет тарапынан барлық жағдай жасалды. Конституцияға "Мемлекеттік тіл - қазақ тілі" деп тайға таңба басқандай жазылды. Енді ешкімге қазақ тілінде сөйлеме деп және тілге кедергі келтіріп отырған бір адам жоқ. Ең бастысы, өзіміз қазақша сөйлеуіміз қажет", - деді Президент.

Мемлекет басшысы жыл сайын елімізде 100 мың бала мектеп бітіретінін, соның 80 мыңы қазақ тілінде тәмамдайтындығын айта келе, барлық мектептерде қазақ тілін оқыту міндетті болып саналатындығын және қазіргі кезде балалар қазақша, орысша, ағылшынша сөйлей алатындығын атап өтті. "Біз Тәуелсіздікті жариялағанда Қазақстанда қазақтың ауқымы 40 пайыз болатын. Қазір қазақтың ауқымы 65 пайызға жетті. Құдайға шүкір, жыл сайын халқымыздың саны көбейіп келе жатыр, оның ішінде негізгі көбейіп келе жатқаны - қазақтың саны. Ал енді барлығын тыйып тастап, қазақ тілінен басқасын заңмен алып тастасақ, онда Украинадағы жағдай болады. Қазір осыны түсінген шығар барлығы. Соны жасап, жұрттың барлығын басынан соғып отырып, қазақтың тіліне алып келіп, қантөгіс қылып, Тәуелсіздіктен айырылуы керек пе, әлде ептеп мәселемізді шешу керек пе? Сондықтан менің ойымша, бұл жерде сабырлылық керек. Болашақ біздің қолымызда, болашақ бізге жұмыс істеп жатыр. Тілді қолдану ауқымы артуда. Барлық облыстарда іс жүргізу қазақ тілінде өтеді. Оған ешкім кедергі жасамайды", - деді Елбасы.

Сондай-ақ Назарбаев: "Бүгінде қазақ тілінде сөйлейтін басқа ұлттар көбейіп келеді. Қазіргі кезде Қазақстанмен өзінің тағдырын қосқан адамдардың барлығы баласына қазақтың тілін үйретуде. Ал енді қазақпен тарихын, болашағын бірге деп санамайтын адамдар бәрібір көшеді, оған біз тыйым сала алмаймыз. Сондықтан өзіміздің халқымыздың сана-сезімін үйретіп, өз тілімізді өзіміз бағалап жүруіміз керек", - деді.

"Тіліміз өркендеп, өсіп келе жатыр. Қазір ешқандай қауіп жоқ. Қазақстанда мемлекеттік тілдің болашағы зор",- деді Елбасы. Сонымен қатар Президент бүгінде әлем халықтарының 70 пайызы ағылшын тілін қолданатынын, бұл ол бүгінде ақпараттың, ғылымның, білімнің тіліне айналғандығын, сондықтан еліміздің экономикасын көтеру бағытында жастар ағылшын тілін меңгеруі тиіс екенін айтты.

Ақпарат көзі: news.nur.kz