Қазақстан Республикасы Ұлттық қауіпсіздік комитетінің облыс бойынша департаменті аса ірі мөлшердегі психотроптық заттарды заңсыз сатып алып, сақтап және тасымалдаған ұйымдасқан қылмыстық топты анықтады. Көңіл көтеру орындарында бармен және даяшы болып жұмыс істеп, ақша тауып жүрген Рамазан Әшім мен Әмірлан Валиевтің ортақ таныстарының өтініші бойынша Алматы қаласынан Таразға синтетикалық есірткі жеткізумен айналысқандығы белгілі болды. Жедел-іздестіру іс-шараларын өткізу нәтижесінде олар ұсталып, наркологтердің қорытындысы бойынша тұтынушының тез психологиялық және физикалық тәуелділігін туғызатын метилендиоксиамфетамин (MDMA) түріндегі психотроптық заттар заңсыз айналымнан тәркіленді. Шілде-тамыз айлары аралығында Тараз қаласындағы облыстық қылмыстық істер бойынша мамандандырылған ауданаралық сотында тыңдалым өтіп, қалыптасқан дәлелдеу базасын зерттеуден кейін сот Әшім Рамазан мен Әмірлан Валиевті 4 жылға бас бостандықтарынан айыруға үкім шығарды. Шығарылған үкім жастарды психотропты заттарды тарату жолымен жылдам ақша табуға шақыратын, «заңды есірткіні» саудалауда құқықтық салдардың болмауы мен қауіпсіздігі туралы жалған ой қалыптастыратын күмәнді интернет сайттар мен әлеуметтік желілерде орналастырылған жарнамалардың қауіптілігін растады. ҚР Ұлттық қауіпсіздік комитетінің облыс бойынша департаменті.