Ақордада Қазақстан Республикасының Президенті Нұрсұлтан Назарбаев елімізге мемлекеттік сапармен келген Корея Республикасының Президенті Пак Кын Хемен кездесті

Шағын құрамдағы кездесу барысында байланыстарды жоғары деңгейде нығайтудың, сауда-экономикалық және инвестициялық-технологиялық ынтымақтастықтың, сондай-ақ Қазақстан мен Оңтүстік Корея стратегиялық серіктестігінің негізгі бағыттары талқыланды.

Нұрсұлтан Назарбаев пен Пак Кын Хе халықаралық күн тәртібіндегі өзекті тақырыптар жөнінде пікір алмасып, халықаралық және өңірлік ұйымдар аясындағы екіжақты іс-қимылдың негізгі мәселелері бойынша тараптардың ұстанымдарын салыстырды. Мемлекет басшысы Оңтүстік Корея Президентінің сапары Қазақстан үшін елеулі оқиға екенін атап өтті. – Біз сіздің елде жүргізілген реформаларды тәуелсіздігіміздің алғашқы күндерінен бастап-ақ зерделеп келеміз. Мен Ро Дэ Удан бастап, Оңтүстік Кореяның барлық президенттерімен кездестім. Сол жылдары басталған біздің қарым-қатынасымыз қазір өте жақсы деңгейде. Сіздің сапарыңыз бұдан да жоғары ынтымақтастыққа жол ашады деп үміттенемін. Біз сіздің елмен саяси және экономикалық тығыз қарым-қатынас орнатуға мүдделіміз, – деді Нұрсұлтан Назарбаев. Өз кезегінде Корея Республикасының Президенті Қазақстан Президентімен өткен жылғы қыркүйекте Санкт-Петербургте өткен G20 саммиті аясындағы кездесуін ерекше жылы сезіммен еске алатынын айтты. – Бізде шынында да ынтымақтастық үшін ауқымды кеңістік пен экономикалық ықпалдастықтың зор әлеуеті бар. Мен бүгін жоғары экономикалық өсім деңгейін көрсетіп отырған, қарқынды дамып келе жатқан Астананы өз көзіммен көрдім, – деді Пак Кын Хе. Сонымен қатар Корея Республикасының Президенті ұзақмерзімді «Қазақстан – 2050» Даму стратегиясы табысты жүзеге асырылатынына сенім білдірді. Қазақстан Президенті делегациялардың кеңейтілген құрамдағы кездесуінде Пак Кын Хенің алғашқы мемлекеттік сапары қазақ-корей стратегиялық серіктестігі тарихында жаңа кезеңнің басы болатындығына тоқталып өтті. Мемлекет басшысы тарихи тұрғыдан қысқа мерзім ішінде Оңтүстік Корея аграрлық елден әлемдегі экономикасы ең озық жиырма мемлекеттің біріне айналып, «экономикалық кереметті» жүзеге асырғанын атап өтті. – Елдеріміз арасында энергетика, автомобиль құрастыру, машина жасау, құрылыс, тау-кен өнеркәсібі, денсаулық сақтау, сондай-ақ білім беру мен ғылым саласындағы өзара ықпалдастық қарқынды дамып келеді, ал жалпы тауар айналымымыз 1,5 миллиард долларға жетті. Осы сапардың нәтижесінде біз ынтымақтастығымызды экономикада да, саясатта да жаңа деңгейге көтеруге қол жеткізе алатынымызға сенімдімін, – деді Қазақстан Президенті. Сондай-ақ, Нұрсұлтан Назарбаев Оңтүстік Корея Республикасының Корей түбегін денуклеаризациялау жөніндегі саясатын Қазақстанның қолдайтынын айтты. Өз кезегінде Корея Республикасының Президенті Қазақстанға келуге шақырту үшін ризашылығын білдірді. – Біз барлық сала бойынша ынтымақтастық мәселелерін талқылаған кездесуге мен ерекше мән беріп отырмын. Елдеріміз арасында берік достық қарым-қатынас қалыптасқан. Біздің халықаралық жағдайға байланысты мәселелерді, соның ішінде Солтүстік Кореяның ядролық проблемасын талқылағанымызды мен құптаймын, – деді Оңтүстік Корея Президенті. Пак Кын Хе Қазақстанның Корея Республикасы үшін негізгі серіктес болып саналатынын атап өтті. Ол сондай-ақ халықаралық маңызды бастамаларға, соның ішінде АӨІСШК аясындағы өзара сенімге құрылған қарым-қатынасты нығайтуға, Корей түбегінде бейбітшілік және сенім орнатуға, сондай-ақ «Еуразиялық бастамаға» көрсетілген қолдау үшін алғысын айтты. «Риксос» қонақ үйінде Нұрсұлтан Назарбаев пен Пак Кын Хе қазақ-корей бизнес форумының ашылу рәсіміне қатысты. Еліміздің Индустрия және жаңа технологиялар министрлігінің, Қазақстан Сауда-өнеркәсіп палатасының және Корея өнеркәсібі федерациясының ұйытқы болуымен ұйымдастырылған бизнес-форум аясында туризм, білім, көлік пен логистика, ауыл шаруашылығы, тамақ өнеркәсібі, банк, фармацевтика, энергетикалық сектор салаларындағы екіжақты қарым-қатынастар мәселелері талқыланды. Астанадағы бизнес-форум аясында, сондай-ақ, бірнеше екіжақты келісімшарт жасалды. Бұл күні авиация саласында Эйр Астана мен Asiana Airlines арасында да меморандум жасалды. Сапар аясында Мемлекет басшылары Нұрсұлтан Назарбаев пен Пак Кын Хе елорданың бірқатар көрікті жерлері мен нысандарын аралады.