Қобызшыларға арналған алғашқы электронды оқулық шықты
Алматыдағы Қазақстан Республикасы Тұңғыш Президенті – Елбасы Қорының ғимаратында елімізде алғаш рет қобызшыларға арналған бірінші электронды оқулықтың тұсаукесері өтті. Жоба мәдениет және өнер саласындағы жас қайраткерлердің шығармашылық жобаларын іске асыруға грант алу үшін өткізілген конкурстың шеңберінде Қазақстан Республикасы Тұңғыш Президенті – Елбасы Қорының қолдауымен жарыққа шықты.
«KOBYZBOOK» – қобызшыларға арналған мобильді қосымша және веб-сайт. Оқу құралының электронды форматы оны интернет желісі арқылы әлемнің кез келген нүктесінен пайдалануға мүмкіндік береді. Яғни, ұялы телефоныңыз немесе компьютер арқылы жүктеп алып қолдана бересіз. Электронды оқулықта 180-нен астам қобызға арналған күйлердің, олардың пайда болуы туралы аңыздар және тарихы туралы аудио-нұсқалар жинақталған. Әрбір шығарманың нотасы, бейне және аудио-нұсқаларының аранжировкасы ұсынылған.
«KOBYZBOOK» орта оқу орындарының оқушыларына және жоғары оқу орындарының шәкірттеріне, сондай-ақ, қобызға қызығушыларға арналған халық аспаптары бойынша әлемдегі бірінші оқулық. Жоба авторы Т.Жүргенов атындағы Қазақ ұлттық өнер академиясының «Дәстүрлі музыка өнері» кафедрасының аға оқытушысы, халықаралық және республикалық конкурстардың лауреаты, «Қазақстан Республикасы Тұңғыш Президенті – Елбасы Қоры» грантының иегері – Мақсат Медеубек.
Оның айтуынша, «KOBYZBOOK»-тің арқасында әрбір адам Қорқыт, Ықылас, Әбікей, Нышан, Ж.Қаламбаев, Д.Мықтыбаев және т.б. талант иелерінің өмірі мен шығармашылығы жайында толық мағлұматпен таныса алады. Оқулықта қазіргі заманғы қобызшылардың есімдері де қамтылған. Аталған электронды оқулық оқу жүйесін жақсартуға, «Мамандық», «Қылқобызшылар ансамблі», «Орындаушылық шеберлік», «Ұқсас аспаптарды зерттеу» пәндері бойынша әдістемелік материалдарды толықтыруға мүмкіндік береді.
Оқулық үш тілде яғни, қазақ, орыс және ағылшын тілдерінде ұсынылған. Тұсаукесер барысында «KOBYZBOOK» жобасының авторы аспаптың шығу тарихымен, оның мағынасы және мәнімен таныстырып, қобызды әзірлеу технологиясы туралы әңгімеледі.
«Электронды оқулығымыздың қоржыны қобызға қатысты тың деректермен және жаңалықтармен толыға бермек. Алдағы уақытта ұлттық өнеріміз бен мұрамызды насихаттайтын аталмыш жобаның ауқымын кеңейту жоспарымызда бар», – дейді Мақсат Медеубек.
Тұсаукесер соңы «Тұран» этно-фольклорлық ансамблі, Қазақстан Республикасы Тұңғыш Президенті – Елбасы Қоры гранттарының иегерлері мен халықаралық және республикалық конкурстардың лауреаттарының қатысуымен өткен концертке ұласты.
ақпарат көзі: egemen.kz
Ұқсас жаңалықтар
