ЭКСПО көрмесі кезінде әлемге танымал цирк ұжымы өнер көрсетеді
Астанада өтетін «ЭКСПО-2017» халықаралық көрмесі кезінде жаһанды мойындатқан «Цирк Дю Солей» ұжымы жұртшылыққа өз өнерлерін паш етеді. Бұл туралы Орталық коммуникациялар қызметінде өткен баспасөз мәслихатында «Астана ЭКСПО-2017» ҰК» АҚ Контент және іс-шаралар ұйымдастыру департаментінің директоры Марат Омаров мәлімдеді, деп хабарлайды Baq.kz тілшісі.
«ЭКСПО» көрмесі аясында «Цирк Дю Солей» әртістері жұртшылыққа өнерлерін көрсетеді. Олар эксклюзивті түрде біздің көрмеге орай арнайы шоу дайындады. Бағдарламаның премьерасы 16 маусымда болады. Жалпы біз көрме аумағында 71 шоу бағдарлама ұйымдастыруды жоспарлап отырмыз. Яғни цирк ұжымы 3 ай аралығында күн сайын көрермендерді өнерлерімен тәнті етпек. Мақсатымыз «ЭКСПО» халықаралық көрмесін жоғары деңгейде өткізу», - деді ол.
Сонымен Марат Омаров цирктегі бір билеттің бағасы қанша болатындығын атап өтті.
«Цирк ұжымы шоу көрсететін шатырға 2 мың көрермен сияды деп жоспарлап отырмыз. Билеттің құны қанша болатындығын әлі де нақтылау керек. Бірақ, шамамен оның бағасы 4 мың теңге болатын шығар. Бұл әлемдегі ең арзан баға. Ал «Астана ЭКСПО-2017» ұлттық компаниясы осы шараға қанша қаржы жұмсағалы отырғандығын айта алмаймын. Себебі, бұл ұлттық компания мен «Цирк Дю Солей» ұжымы арасында жасалған келісімге қайшы келеді», - деп түйіндеді сөзін басшы.
Айта кетейік, «Цирк Дю Солей» ұжымы Астанада 16 маусымнан 10 қыркүйек аралығында өнер көрсетуді жоспарлап отыр.
ақпарат көзі: Baq.kz
Ұқсас жаңалықтар
