Жаңа оқу жылы қарсаңында «Мектепке жол» акциясы жыл сайын дәстүрлі түрде өткізді. Аталған шараға қатысып, балаларға мектепке қажетті киім-кешегі мен құрал-жабдықтарын алып беруге ниет білдірген азаматтардың қатары да жыл санап артып келеді. Шара аясында әлеуметтік жағдайы төмен отбасы балаларына қоғам болып қамқорлық көрсетілуде. Қашанда игі бастама мен тың жаңалықтың басы-қасында жүретін «Нұр Отан» партиясы аталған акциядан тыс қалмады. Партия облыстық филиалы аппаратының қызметкерлері Тараз қаласында тұратын бес мектеп оқушысына қайырым­дылық көмек көрсетті. – Мұндай игі істен «нұротандықтар» шет қала алмадық. Бұл акцияны жетімі мен жесірін желеп-жебеп жүретін халқымыздың қашаннан бар қасиетінің бір көрінісі дер едім. «Мектепке жол» акциясы оқушыларымызға материалдық көмек көрсетуге негізделсе, «Нұр Отан» партиясының «Бақытты балалық шақ» бағдарламасы да ел ертеңі – балаларымыздың болашағын қалыптастыруға бағытталған. Сондықтан, ел келешегіне бейжай қарамайтын кез-келген азамат мұндай шараға үн қатуы керек деп білемін, – деді аталған жиында сөз сөйлеп, балаларға базарлықты үлестірген «Нұр Отан» партиясы облыстық филиалы төрағасының орынбасары Шәбден Тілеумұрат. Келесі кезекте Тараз қаласы №41 мектеп-гимназиясының бес оқушысына киім-кешектер мен мектепке қажетті құрал-жабдықтар табыс етілді. «Ағаларымыз бен әпкелеріміздің көмегіне көп алғысымды айтамын. Осы кісілердің үмітін ақтап, сабағымды жақсы оқуға бар күш-жігерімді саламын», – дейді енді екінші сыныпқа аяқ басатын Әділ Жәнібеков.

Маржан РАҚАЙ, «Ақ жол».