Қазақстандық хирургтер алғаш рет жүрек пен бүйректі ауыстырып салды
Қазақстандық оташылар отандық медицина тарихында алғаш рет жүрек пен бүйректі бір мезетте ауыстырып салу отасын жасады. Мұндай әмбебап ота бұған дейін тек АҚШ, Оңтүстік Корея және Италияда ғана жасалатын. Енді міне, қазақстандық хирургтер де бірегей ота жасай бастады, деп хабарлайды BNews.kz.
3 тамызда Жүрек орталығында оташылардың бір тобы ертеден кешке дейін ота бөлмесінде қызу еңбек етті. Алдымен кардиооташылар науқасқа жүрегін ауыстырып салды, бұдан соң Ұлттық онкология және трансплантология ғылыми орталығының мамандары бүйрек ауыстыру отасын жасады. Науқас күйінің күрделілігі оған бір мезетте сәйкес келетін екі мүшені табуда болатын. Өзге жағдайларда бір мүшені ауыстыру оталарына қарағанда, бұл кезеңде отаға дайындық аса мұқият жүргізілуі тиіс. Науқасқа толыққанды өмір сүруіне қажетті жүрек пен бүйрегінің бірі ауыстырып салынды. Дәрігерлер осы отадан соң науқастың үйреншікті өміріне толыққанды оралатынына сенім білдірді.
Жүрек пен бүйректі бір мезетте ауыстырып салу – созылмалы жүрек жеткіліксіздігі мен бүйрек жеткіліксіздігінен зардап шегетін науқастарды тиімді емдеудің мүмкін бағыттарының бірі. Бір мезетте адамның бірнеше мүшесін ауыстырып салу отасы әлемнің санаулы елдерінде ғана жасалады.
Қазір отаны бастан өткерген 37 жастағы науқас – Амангелді Напилов отбасына оралды, науқастың күйі жақсы, қалыпты өмірге көндігіп келеді.
Сауатты ота, дәрігерлердің алтын қолдары мен ертеңгі күнге деген сенімнің таңғажайып нәтижелерге жетелейтіні айқын. Амангелдіге екінші өмір сыйлаған да сол таңғажайып екендігі сөзсіз.
Ақпарат көзі: BNews.kz
Ұқсас жаңалықтар
