Аты аңызға айналған футболшы, үш дүркін әлем чемпионы Пеле Рио-де-Жанейродағы Олимпиада ойындарының жабылу салтанатына қатысуға уәде берді. Ол бұл туралы өзінің твиттер парақшасында мәлім етті. «Мен физиотерапия алуды жалғастырып жатырмын және 21 тамыз күні мерекелік іс-шараның жабылуына қатысуға ниеттімін. Сіздерді жақсы көремін», - деп жазады әйгілі футболшы өзінің твиттер жеке парақшасына. Еске сала кетейік, Пеле Рио-де-Жанейро олимпиадасының салтанатты ашылуында төртжылдық доданың алауын тұтатады деп жоспарланған болатын. Алайда, ол бүкіл әлем алдына сүйеніш таяғымен шығуды қаламады. Нәтижесінде, 5 тамыз күні Олимпиада ойындарының ашылу салтанаты кезінде олимпиада алауын 2004 жылы Афинада өткен Олимпиада ойындарында марафон жүгіруде қола жүлде иеленген 46 жастағы Вандерлей Кордейру ди Лима жақты.

Ақпарат көзі: ҚазАқпарат