Педро Лука есімді аргентиналық елдің солтүстігіндегі Тукуман провинциясында үңгірде 40 жылдан бері өмір сүріп келе жатыр. 79 жастағы ер адам су құбыры мен электр жарығын пайдаланбай-ақ ғұмыр кешуде.

Бұл туралы bigpicture.ru хабарлайды. Ол қарны ашқан кезде аңшылыққа шығып тамақ табады. Ал үңгір жанындағы кішкентай бұлақтың суын тұрмысына пайдаланады. “Бұл әлемдегі ең таза су” дейді өзі. Ол оншақты тауық пен екі ешкісін бағады. Күні бойы соларды баптап, кешкілік олардың қауіпсіздігін күзетеді. Сан-Педро-де-Колалао тұрғындары оған жиі тамақ апарып беріп тұрады. Ол 100-200 доллар тұратын зейнетақысын жақын маңдағы почтаға барып, соған азық-түлік сатып алады. Ондағы жалғыз техника – батерейкадағы шағын радио. Алайда тауда сигнал әлсіз болғандықтан оны іске жаратудың өзі қиын. Ол табиғат аясында өмір сүруді бала кезінен армандапты. Оны атасы тәрбиелеген. Педро алғаш рет 14 жасында ауылдан кетіп қалған. Сөйтіп, Солтүстік Аргентинаға саяхат жасап қайтады. Қайта туған жеріне оралғаннан кейін үңгірде өмір сүре бастайды. Оның өмірі туралы ауыздан ауызға тарап, қазіргі таңда оны көруге туристер ағылып келіп жатыр. “Жақын маңда тағы бір үңгір бар еді, бірақ маған осы үңгір ұнады. Бұрын әлемді араласам деген де арманым бар еді. Алайда ол үшін өте көп уақыт керек”, – дейді ол.