Наиб мүфти: Қазақстанға қажылыққа үш мың квота бөлінді
Қазақстанға қажылыққа үш мың квота бөлінді. Бұл туралы Қазақстан мұсылмандары діни басқармасы төрағасының орынбасары, наиб мүфти Серікбай қажы Ораз қажылық конкурсының іріктеуінен өткен компания басшыларымен өткен жиналыста айтты, деп хабарлайды BNews.kz.
Басқосу барысында наиб мүфти Серікбай қажы Ораз ҚМДБ қажылық бөлімінің жаңа басшысы Бейбіт Мырзагелдиевпен таныстырып, биылғы қажылық маусымында атқарылатын жұмыстарға тоқталып өтті.
«Биыл Қазақстанға қажылыққа үш мың квота бөлінді. Қажылық қызметі елімізде жылдан жылға жолға қойылып келе жатыр. Қызмет көрсету сапасы да артты. Биыл да еліміздің қажыларына Flynas әуекомпаниясы толықтай қызмет көрсетеді. Қажылар Астана, Алматы, Шымкент қалаларынан тікелей рейс арқылы ұшады», – дейді Серікбай қажы Ораз.
Жиында турфирмалардың сапары барысында қызмет көрсету сапасын арттыру мәселелері талқыланып, бірнеше талап қойылды. Сондай-ақ, Бейбіт Мырзагелдиев миссия жұмысы туралы мәлімет беріп, алдағы жұмыс жоспары жайлы мәлімдеді.
Ақпарат көзі: BNews.kz
Ұқсас жаңалықтар
