Көкшетауда мектеп оқушысы Александр Данилов ми импульсын басқаратын құрылғы ойлап тапты, деп жазды «Егемен Қазақстан» газеті бүгінгі санында.

Авторлық жұмысының арқасында ол халықаралық конкурста екінші орынды иеленді. Бұл құрылғыға мамандар ерекше қызығушылық танытып отыр. Ал еліміздің бірқатар жоғары оқу орындары 11 сынып оқушысын грант негізінде оқуға қабылдауға дайын.

Жаңа құрылғыны №19 фи­зика-математикалық мектептің оқушысы өзінің ұстазы Виктор Гайдаренконың көмегімен құрастырып шығарған. Ол зерттеу жұмысымен бесінші сыныптан бері айналысып келеді екен.

- Адам білегіне жалғанған сым арқылы біз биоимпульсты аламыз. Алақанымды қысқан кезде биоток трансформаторға түсіп, мың есе күшейеді. Осыдан соң атқарушы механизмді іске қосатын сызбанұсқаға орналасады. Халықаралық конкурста екінші орын алғаным үшін маған ҰБТ-ның 125 балдық сертификатын тапсырды, - дейді Александр Данилов.

Бұл мектепте дарынды балалар жеткілікті. Александр сияқты талантты мектеп оқушыларының бірі - Бақтияр Қабашев. Ол жарамсыз болып қалған люминисценттік шамдарды екінші мәрте қол­данудың жолдарын ойлап тапты.

- Жұрт күйіп кеткен шамдарды қоқысқа тастауды жөн көреді. Ал олардың құрамында адам денсаулығына кері әсерін тигізетін сынап бар. Осыған байланысты мен люминисценттік шамдарды қайтадан пайдаланудың жолдарын қарастырдым. Алдағы уақытта бұл екі конденсатор алты диод және бір резистордың көмегімен жұмыс істейтін болады, - деді Бақтияр Қабашев.

Айта кетейік, ғалымдар Алек­сандр Даниловтың жобасын өнер­кәсіпте, медицинада, авиация­да және тұрмыстық жағдайларда қолдануға болады деп санайды. Ал Бақтияр Қабашевтың жұмысы люминисцентті шамдардың қауіп­тілігінен сақтайды.