Қарағандыда Наурыз мерекесіне орайы Қ.Сәтпаев атындағы тарихи-өндірістік мұражайы көшпелі көрме өткізді.

Көрме «Қазақмыс» корпорациясының киіз үйлер этно ауылында орналастырылды. Көпшілік назарына көне қару-жарақ, ортағасырлық әшекейлер, тұрмыстық құрал-жабдықтар, ыдыстар ұсынылды. Тамашалаушылар бас экспонат - Шыңғыс ханның балауыздан жасалған мүсінімен бірге суретке түсу үшін кезекке тұрды.

«Мүсіндерді Жезқазған қаласынан жеткізудің өзіндік қиындықтары болды. Алайда осында қойылған соң, оған көпшіліктің қызығушылығы бар екенін көрдік. Шыңғыс ханның балауыз мүсіні мұражайымыздың тапсырысымен 10 жыл бұрын жасалған. Ресей астанасында Герасимов әдістемесі бойынша антропологиялық келбетті жасайтын зертхана бар. Шыңғыс ханның тура өзінің сүйегі табылған жоқ, алайда сипаттау, жылнама, дереккөздер секілді мәліметтер негізінде мүсін әзірленді», - дейді мұражайдың бас маманы Арман Бермағамбетов.

Сонымен қатар, жұрт назарына Қарағанды облысының Ұлытау ауданындағы Алаша хан мен Жошы хан мазарларының макеті ұсынылды.