Денсаулық сақтау және әлеуметтік даму министрлігінің пайымынша,  31 желтоқсан күнін демалыс күні етіп жасауға болады.

«Егер де біздің қоғам бұл мәселені қарастырғысы келсе, әрине, болады. Басқа жағынан алып қарағанда, ұжымдық-келісім қатынастары туралы айтатын болсақ, 31 желтоқсан күні тым болмаса түстен кейін жұмыс істегіңіз келмейтінін қоғам мүшесі ретінде жарияласаңыз, онда жұмыс беруші де осындай пікірде деп ойлаймын. Сондықтан да менің ойымша, кәсіпорындарда тәжірибе жүзінде бұл мәселе өздерінің арасында шешіліп жүр. Егер де заңнамалық тұрғыда алып қарайтын болсақ, бұл тақырыпты қарастыруға тыйым салынды деп айта алмаймын»,- деді бүгін Денсаулық сақтау және әлеуметтік даму вице-министрі Біржан Нұрымбетов «Нұр Отан» партиясы баспасөз орталығында өткен брифингте.

Осы орайда ол демалыс ретінде белгіленген мерекелік күндер арнайы заңмен реттелетінін еске салып өтті. Оған сәйкес, 1 және 2 қаңтар демалыс күндері ретінде белгіленген.

Өз кезегінде мәжіліс депутаты Ирина Аронова бұл тақырып қоғамда кеңінен талқыланса, онда депутаттар оны қарастыруға дайын екенін жеткізді.