Ата-баба жолыменен бұрыннан, Бізге жеткен айналасың ырымнан! Келін болып түскен үйге сол күні-ақ, Ақ жібектен, ақ шымылдық құрылған. Көрмеп едім өңім түгіл түсімде, Артық мін жоқ қарап тұрсаң ісінде. Келін болып түскен үйде ізетті, Ару отыр ақ шымылдық ішінде. Махаббаттың адалдығын ақтаған, Ата-баба дәстүріне мақтанам! Ақ шымылдық аясында ақ пейіл, Сол ару қыз салт-дәстүрін сақтаған. Кім бар екен жақсылықпен таласқан? Қандай жақсы салт-дәстүрмен санасқан. Адалдықтың ақ белгісі іспетті, Ақ шымылдық аруларға жарасқан! Көрсетпестен шаңырақтың жаттығын, Деп айтады: « келін түссе сәтті күн!» Ақ шымылдық ару қыздың тап-таза, Арқалап тұр ары менен пәктігін! Жаратқан соң ер жігітін шымыр ғып, Өмір берсін адамдарға ғұмырлық! Қазағымның ана болар қызына, Қастерлі екен, қасиетті шымылдық!

 Сайлаубай Тойлыбаев.