Жамбыл облысында көп пәтерлі үйлердің иелері ТКШ-ны жаңғырту бағдарламасы аясында баспаналарын жөндеу үшін мемлекет жұмсаған қаражаттың 60%-ын ғана қайтарды.

Энергетика және тұрғын үй-коммуналдық шаруашылығы басқармасының ақпаратынша, 2011-2015 жж ТКШ жаңғырту мемлекеттік бағдарламасын жүзеге асыру үшін  аймаққа республикалық қазынадан 2,48 млрд. теңге бөлінді. Бұл қаражатқа 170 көппәтерлі үй жөнделді. 2015 жылы облыс орталығында 28 үй, Шу қаласында 3 үй қалпына келтірілді.

ТКШ жаңғырту мемлекеттік бағдарламасын жүзеге асыра бастағаннан жөндеуді қажет ететін үйлер 49,2%-дан 39,7%-ға дейін қысқарды. Тағы 626 тұрғын үйді жөндеу керек.

2014 жылы жүргізілген жөндеу жұмыстары үшін қайтарылған ақша 2 млн. теңгеден асты немесе 60% құрады.

Ведомствода атап өткендей, тұрғындар қарызын өтеуі үшін тиісті шаралар қабылданып жатыр.

Тараз қалалық әкімдігінің ақпаратынша, 4 жылда 139 үй жөнделді.