Қазақстандық валюта үш күн қатарынан құнын түсіруде. Өткен аптаның соңынан бастап доллар 5,1 теңгеге қымбаттады деп хабарлайды Nur.kz тілшісі.

Қазақстан қор биржасындағы таңертеңгілік сауда қорытындысы бойынша, орташа сараланған бағам долларына 284,28 теңгеге дейін жетті. Сол арада, Қайрат Келімбетов Ұлттық банктегі қызметін босатқан сәтте доллар құны 279,18 теңге болған. Кейін 2 қарашада доллар 280,37 теңгеге жетті. 3 қарашада 282,7 теңге болып өсіп, 4 қарашада 284, 28 теңгеге қойылды. Еске салсақ, сарапшы Әнуар Байкенов Ұлттық банктің жаңа басшысы Данияр Ақышевтің тұсында доллар бағамы 300 теңгеге дейін жоғарылайды деген болжамын жария еткен болатын. Бүгін таңертең айырбас нүктелеріндегі доллар құны 287 теңгеге дейін жеткен.