Чехияда рок-топ өз атауларын “Қазақстан” деп қойды. Шетелдік топ еліміздің атын тегін шығарып жүр.

Чехиялық «Қазақстан» атты арт-рок тобының жаңа альбомы «Қорқудан қорқамын» деп аталады. Қазанның 14-і күні топ Острава қаласында өткен дәстүрлі «Протимлув» фестивалінде сахнаға шығып, жанкүйерлеріне жаңа әндерін шырқады.

«Қазақстан» тобы бес адамнан тұрады. Барабанда – Йиржи Гершл, әнші әрі гитарашы – Алан Грезл, синтезаторда – Далибор Дымачек, бас гитарада – Йозеф Жердик, жеке гитара мен синтезаторда – Роберт Хейдук.

Әндерінің мәтінін Ярослав Жила жазады. Топтың құрылғанына 19 жыл толған. Қазақстанда жарты жыл тұрған Йиржидің ұсынысымен топ кейін атауын «Қазақстан» деп өзгерткен.

Елді тани түскен сайын бұл атау тобымызға жақсы келеді деп шештік

“Қазақстанда жарты жылдай болдым, Алматыға, Астанаға, солтүстікке бардым. Қазақстан қатты ұнады. Тобымыздың атын «Қазақстан» деп өзгерттік. Елді тани түскен сайын бұл атау тобымызға жақсы келеді деп шештік. Атмосферамызға, сезімімізге, жазатын музыкамызға жарасады. Өзіміз үшін бірақ Қазақстан туралы ән шырқаймыз”, – дейді Йиржи Гершл.

Топ мүшелері осы елден шабыт алатындарын, музыкасының негізінде шығыс даласының сазы мен сағынышы, заманауи өркениет алдындағы табиғаттың жойылу қорқынышы жатқанын айтады. Остравалық «Қазақстан» тобы жазатын музыканың өзегі өмір мен еркіндік философиясы.

Біздің әнге қосатынымыз виртуалдық бір ел болып көрінеді

“Қазақстан мен үшін бір қиырда жатыр. Сол себепті оны алыстағы ел деп түсінемін. Біздер – еуропалықтар үшін жұмбақ ел деп білемін. Ешқашан барып көрмеппін, сол себепті білмеймін. Біздің әнге қосатынымыз виртуалдық бір ел болып көрінеді”, – дейді Алан Грезл.

Чехиялық музыканттар болашақта Қазақстанда концерт қойса, жергілікті тыңдармандар оларды жылы қарсы алады деп үміттенеді.