Қазақстан қырғыз және ресейлік өнімдерді әкелуге және өткізуге уақытша шектеу енгізді деп хабарлайды Ұлттық экономика министрлігі.

Тұтынушылардың құқықтарын қорғау және халықтың санитариялық-эпидемиологиялық саламаттылығын қамтамасыз ету мақсатында 2015 жылғы 8 қыркүйектен бастап Қазақстанның аумағына келесі өндірушілер мен атаудағы тамақ өнімдерін әкелуге және өткізуге уақытша шектеу енгізілді.

“Шешім ағымдағы жылғы 8 айда жүргізілген зертханалық зерттеулерді талдау нәтижелері бойынша қабылданды, микробиологиялық көрсеткіштер бөлігінде және ашытқылар бойынша санитариялық-эпидемиологиялық және техникалық регламенттердің гигиеналық көрсеткіштерін бірнеше рет бұзу фактілері анықталды”, — делінген хабарламада.

Ведомствоның мәліметінше, бұзушылықтар келесі өнімдерде анықталды: Ресей, Мәскеу облысы, «Хохланд» Руссланд ЖШҚ өндірген әртүрлі дәмі бар HOCHLAND балқытылған ірімшігі; Ресей, Мәскеу облысы, «Преображенский» ЖШҚ МК өндірген әртүрлі дәмі бар глазурленген ірімшігі; Ресей, Мәскеу облысы, «Кампина» ЖШҚ өндірген йогурт сусындары; Қырғызстанда өндірілген Шаруа сары майы; Ресей, Орлов облысы, «Верховский молочно-консервный завод» ЖАҚ өндірген «Славянские қант қосылған қойылтылған кілегей» құрамында сүт бар қойылтылған өнімі; Ресей, Мәскеу қаласы, «Микояновский мясокомбинат» ЖАҚ өндірген сосиска өнімі; Ресей, Кемерово қаласы, «КДВ Кемерово» ААҚ өндірген «Яшкино» сауда белгісінің «Шоколайт» және «Голландские» вафлиі.