Көшеде автоматтардан сатылатын жұмсақ балмұздақтың адам денсаулығы үшін өте қауіпті екені анықталды.

Бұл туралы бүгін  өткен брифинг барысында Павлодар облысының мемлекеттік бас санитарлық дәрігері Сәуле Шәріпова мәлім етті деп жазады pavlodarnews.kz.

“Көшелерде жұмсақ балмұздақ даярлау үшін ешбір жағдай жасалмаған. Балмұздақтың мұндай түрі жабдықтары толығымен жуылып, тазаланатын дәмханалар мен мейрамханаларда ғана болады. Ол жерлерде қызметкерлердің санитарлық кітапшалары бар әрі жеке бас гигиенасын сақтау үшін толық жағдай жасалған. Ал көшедегі сатушылар жұмсақ балмұздақтарды дайындау үшін суды кез келген жерден, көбінесе жақын орналасқан дүкендердің дәретханасынан алады”, – деді бас санитар.

Санитарлық дәрігердің айтуынша, осындай жағдайға қарамастан, өткен жеті айда департаментке жұмсақ балмұздақпен уланған бір де бір адамнан шағым түспеген.

Алайда тұрғындардың тазалық шаралары сақталмайтын орындардан балмұзақ сатып алудан бас тартқаны жөн.