Елордада Астана күнінде 79 нәресте дүниеге келді, - деп хабарлайдыTengrinews.kz тілшісі қалалық әкімдіктің баспасөз қызметіне сілтеме жасап. Баспасөз қызметінің мәліметінше, дүниеге келген нәрестелердің 28-і қыз, ал қалған 51-і ұл бала. Айта кетейік, былтыр осы күні 61 сәби: 33 ұл және 28 қыз туған болатын. Еске сала кетейік, 6 шілдеде Астананың 17-ші туған күні тойланды. Қала күні мерекесі аясында 100-ден астам шара ұымдастырылды. Дәстүрлі мерекелік бағдарламалардан бөлек қала тұрғындары мен қонақтары жауынгерлік өнер фестивалін, үрмелі аспаптар оркестрлері фестивалін, иллюзионистер шоуы мен "Нұрлы Есіл" лазерлік-пиротехникалық шоуын тамашалады. Қала көшелерінде этноауылдар мен ЗD қалашықтар тігіліп, Есіл өзенінің жағалауында түрлі ұлттардың мәдениетімен танысуға мүмкіндік болды. Астана аспанында жүздеген шар мен батпырауық қалықтап, саябақтарда ауқымды фестивальдар мен халықтық серуен өтті.